امریکی صدر جو بائیڈن کی  مقبولیت  مزید نچلی سطح پر آ گئی، امریکی اخبار

تفصیلات کے مطابق   اے بی سی نیوز اور واشنگٹن پوسٹ کے ذریعے سروے کرایاگیا، سروے  کے نتیجے میں پتہ چلا کہ امریکی صدر جو بائیڈن کی  مقبولیت  مزید کم ہوگئی ہے۔

سروے سے معلوم ہوا  ہے کہ صرف 37 فیصد امریکیوں کا کہنا ہے کہ وہ بائیڈن کے کام کو پسندکرتے ہیں،  55 فیصد کا کہنا ہے کہ وہ بائیڈن کی کارکردگی کو ناپسند کرتے ہیں جبکہ    44 فیصد نےبائیڈن کی حکومت کو سختی سے نامنظور کیا۔

 پول میں یہ بھی پایا گیا ہے کہ 37 فیصد بائیڈن کی معیشت کو سنبھالنے سے مطمئن ہیں، جبکہ 58 فیصد نہیں ہیں۔ مجموعی طور پر 75 فیصد امریکیوں کا امریکی معیشت کے بارے میں منفی نظریہ ہےجبکہ  54 فیصد کا خیال ہے کہ بائیڈن کے اقتدار سنبھالنے کے بعد سے ملکی معیشت بدتر ہو گئی ہے۔

سروے  کے مطابق  ہر 10 میں سے 6 امریکیوں نے کہا کہ افراط زر نے خود یا ان کے خاندان کے افراد کے لیے مشکلات پیدا کی ہیں اور  ہر 10 میں سے 3 امریکیوں کا کہنا ہے کہ انہیں شدید مشکلات کا سامنا ہے۔