روس  میں فیس بک ، ٹوئٹر اور یو ٹیوب پر پابندی عائد

برطانوی میڈیا کے مطابق روس کے میڈیا کے نگران ادارے نے ٹوئٹر تک رسائی کو بند کر دیا۔روس میں ٹوئٹر کے ساتھ ساتھ فیس بک اور یوٹیوب پر بھی بندش کا سامنا ہے۔

ماسکو نے روس - یوکرین جنگ کے درمیان  ملک میں ٹویٹر اور یوٹیوب کے ساتھ ساتھ فیس بک کو بھی بلاک کر دیا ہے ۔ ان سوشل میڈیا پلیٹ فارمز پر روسی کمپنیوں کے ساتھ امتیازی رویہ اپنانے کا الزام ہے۔ ساتھ ہی فیس بک کی جانب سے جاری بیان میں کہا گیا ہے کہ روس نے اپنے فیصلے سے لوگوں کو  معلومات سے محروم کر دیا ہے۔

امریکہ اور یورپی یونین  کی جانب سے  روس پر سخت پابندیاں عائد کی جارہی ہیں جن میں یورپی حکام نے روسی ریاستی حمایت یافتہ چینلز ، ٹیلی ویژن نشریات اور سوشل میڈیا پر بھی پابندی کا مطالبہ کیا گیا ۔ 

 اس سے قبل روس نے بی بی سی پر بھی پابندی عائد کی ہے۔ روس نے میڈوزا اور ریڈیو لبرٹی خبر رساں ادارے بھی بلاک کردئیے ہیں۔ روسی وزارت خارجہ کا کہنا ہے کہ بی بی سی کو امن خراب کرنے کے لیے استعمال کیا جا رہا ہے۔

ماسکو کا موقف ہے کہ برطانیہ سمیت غیر ملکی میڈیا دنیا کے سامنے جزوی نظریہ پیش کر رہا ہے۔لیکن مغربی حکومتیں اس دعوے کو مسترد کر رہی ہیں، اور روسی سرکاری میڈیا پر تعصب کا الزام لگا رہی ہیں۔

واضح رہے کہ روس نے یوکرین پر 24 فروری کو حملوں کا آغاز کیا جس کے بعد یورپی یونین اور امریکا نے روس پر پابندیاں نافذ کرنے میں پہل کی تاہم اب روس کی جانب سے بھی اب سوشل میڈیا کو بند کردیا گیا ہے ۔