وزیراعظم کا سیلابی صورتحال پر ہنگامی اجلاس طلب، خیبرپختونخوا میں امدادی کارروائیاں تیز

وزیراعظم شہباز شریف نے ملک میں حالیہ بارشوں اور سیلابی صورتحال کے پیش نظر ہنگامی اجلاس طلب کر لیا ہے۔

ذرائع کے مطابق اجلاس میں وزیراعظم کو ملک بھر میں بارشوں اور سیلاب سے پیدا ہونے والی صورتحال پر تفصیلی بریفنگ دی جائے گی۔

دوسری جانب وزیراعظم نے خیبرپختونخوا میں شدید بارشوں اور سیلاب کے باعث پیدا ہونے والی صورتحال پر نیشنل ڈیزاسٹر منیجمنٹ اتھارٹی (این ڈی ایم اے) کے چیئرمین سے رابطہ کیا۔

وزیراعظم شہباز شریف نے چیئرمین این ڈی ایم اے کو ہدایت دی کہ خیبرپختونخوا میں امدادی کارروائیاں بھرپور انداز میں جاری رکھی جائیں اور متاثرہ افراد کو فوری ریلیف فراہم کیا جائے۔ وزیراعظم نے کہا کہ متاثرہ علاقوں میں امدادی سرگرمیوں کے لیے تمام دستیاب وسائل بروئے کار لائے جائیں۔

اس کے ساتھ ہی وزیراعظم نے لیفٹیننٹ جنرل انعام حیدر کو خیبرپختونخوا حکومت سے قریبی رابطہ رکھنے اور امدادی اقدامات کو مربوط بنانے کی ہدایت بھی جاری کی ہے۔