شمالی غزہ پر اسرائیلی قبضہ، لاکھوں فلسطینی نقل مکانی پر مجبور

اسرائیل نے فلسطینی شہریوں کو زبردستی 'جنگی علاقوں' سے نکال کر جنوبی غزہ منتقل کرنے کا اعلان کیا ہے۔

یہ اعلان ایسے وقت سامنے آیا ہے جب اسرائیل نے حال ہی میں غزہ پر مکمل کنٹرول کے منصوبے کا انکشاف کیا تھا۔

عرب میڈیا کے مطابق، اسرائیلی فورسز نے شمالی غزہ پر قبضے کی کارروائیاں تیز کردی ہیں۔

رپورٹس کے مطابق، اسرائیل شمالی غزہ سے 10 لاکھ سے زائد فلسطینیوں کو زبردستی جنوبی علاقوں کی جانب دھکیل رہا ہے۔

اسرائیلی فوج کے ترجمان کا کہنا ہے کہ شمالی غزہ کے شہریوں کو جنوبی علاقوں میں منتقل کرنے کے بعد ان کے لیے خیمے اور دیگر امدادی سامان اقوام متحدہ اور دیگر بین الاقوامی اداروں کی مدد سے فراہم کیا جائے گا۔

تاہم، اقوام متحدہ کی جانب سے نہ تو اسرائیلی منصوبے پر کوئی ردِعمل سامنے آیا ہے، نہ ہی امدادی سامان کی فراہمی میں اپنے مبینہ کردار پر کوئی وضاحت دی گئی ہے۔

یاد رہے کہ 14 اگست کو اقوام متحدہ نے خبردار کیا تھا کہ ہزاروں فلسطینی خاندان پہلے ہی شدید غذائی قلت کا سامنا کر رہے ہیں، اور اگر غزہ سٹی پر فوجی قبضے کا منصوبہ جاری رہا تو ہزاروں افراد موت کے قریب پہنچ جائیں گے۔

چند روز قبل اسرائیلی وزیراعظم بنیامین نیتن یاہو نے اعلان کیا تھا کہ فوج کو شمالی غزہ کے شہر اور جنوبی علاقے "المواسی" پر مکمل کنٹرول کی اجازت دے دی گئی ہے، جنہیں حماس کے مضبوط گڑھ تصور کیا جاتا ہے۔

اسی دوران اسرائیلی فورسز نے غزہ کے "ال عہلی" اسپتال پر حملہ کیا، جس کے نتیجے میں 7 فلسطینی شہید ہوگئے۔

فلسطینی وزارت صحت کے مطابق، گزشتہ 24 گھنٹوں میں غذائی قلت کے باعث مزید 11 فلسطینی شہید ہوئے، جس سے غذائی قلت سے ہونے والی ہلاکتوں کی مجموعی تعداد 251 ہو گئی ہے، جن میں 108 بچے بھی شامل ہیں۔

عرب میڈیا کے مطابق، گزشتہ روز اسرائیلی حملوں میں 14 امداد کے منتظر افراد سمیت 31 فلسطینی شہید ہوئے تھے۔