ن لیگ نے یوسف گیلانی کو برادران یوسف کی طرح دھوکا دیا: فردوس عاشق اعوان

میڈ یا سے گفتگو کرتے ہوئے فردوس عاشق اعوان نے کہا کہ،چیئر مین سینیٹ کے الیکشن میں پاکستان ڈیموکریٹک موومنٹ(پی ڈی ایم) کے اندر کی مخالف سامنے آگئی ہے، پی ڈی ایم کا متنازع کردار کسی کوبھی قبول نہیں۔عوام ان سے چھٹکارا چاہتی ہے۔ان کا کہنا تھا ن لیگ سیاسی جماعت نہیں بلکہ شاہی غلاموں کی انجمن ہے، ن لیگ کے قریب جمہوریت کامطلب اقتدار کا حصول ہے،ن لیگ نے سیاسی اختلافات کو ملک دشمنی سے جوڑ دیا ہے۔ میاں جاوید لطیف کے بیان پر رد عمل دیتے ہوئے ان کا کہنا تھا کہ جاوید لطیف نے خود اپنے بیانیے کی قبر کھود ی ہے،میاں جاوید لطیف کا بیان ان کی سوچ کی عکاسی کرتا ہے، مودی کی سازشوں میں ن لیگ حصہ دار بن گئی ہے۔

 انہوں نے کہا کہ میاں جاوید لطیف نے 22کروڑ عوام کے جذبات کو للکارا ہے، پاکستان کے مخالفین پاکستان کا بال بیکا نہیں کرسکتے،یہاں شہیدوں کا خو ن جذب ہے،شہیدوں نے خون سے پاک دھرتی کی حفاظت کی ہے، پاکستان قیامت تک دنیا پر قائم دائم رہے گا، پاکستان کا بچہ بچہ دھرتی پر کٹ مرنے کو تیار ہے۔

 مریم نواز کی ضمانت منسوخی کی درخواست کے حوالے سے انہوں نے کہا کہ جعلی راجکماری پھولن دیوی کا روپ دھا ر چکی ہے، کسی بھی شخص کی ضمانت ہونا یا اس کے خلاف اپیل دائر کرنا قانونی عمل ہے۔فردوس عاشق اعوان کا کہنا تھا کہ ہمیں پاکستان سے گند صاف کرنے کا مینڈیٹ ملا ہے اور ہم اسے صا ف کریں گے۔ فاٹا نے دہشتگردی کے لئے قربانیاں دیں اس لئے وزیر اعظم نے ڈپٹی چیئرمین سینیٹ کے لئے فاٹا سے انتخاب کیا۔پی ٹی آئی چھوٹے صوبوں کو حق دینا چاہتی ہے۔ پنجاب وفاق کے ساتھ دوسرے صوبوں کو مضبوط بنانے میں کردار ادا کرے گا۔