اپوزیشن اتحاد میں گئے تو وزارتوں سے استعفی دیں گے، پرویز الہی

اسپیکر پنجاب اسمبلی چوہدری پرویز الہی نے میڈیا سے غیر رسمی گفتگو کرتے ہوئے کہا کہ  اس بات پر اتفاق ہوگیاہے کہ موجودہ اسمبلیاں اپنی مدت پوری کریں گی۔ آئین و قانون بڑا واضح ہے، اسپیکر قومی اسمبلی کو اس پر عمل کرنا چاہئیے۔

پرویز الہی کا کہنا تھا کہ ہم اپنا فیصلہ کرچکے ہیں، اس پر اپنے ساتھیوں سے حتمی مشاورت کررہے ہیں، مسلم لیگ ق، ایم کیو ایم اور بلوچستان عوامی پارٹی مل کر چل رہے ہیں،اپوزیشن اتحاد میں گئے تو وزارتوں سے استعفی دیں گے۔

اسپیکر پنجاب اسمبلی نے کہا کہ آج جہانگیر ترین گروپ کے عون چوہدری ملاقات کے لئے آئے تھے، اگلے دو دن میں وہ بھی ہمیں اپنی حمایت کا بتائیں گے۔ ان کا کہنا تھا کہ  شہباز شریف کے ساتھ ملاقات کسی بھی وقت ہوسکتی ہے، وزیراعظم عمران خان کو اپنی کوششیں جاری رکھنا چاہئیں۔