وزیر اعظم سے ارکان قومی اسمبلی کی ملاقاتیں، اراکین کا وزیر اعظم پر مکمل اعتماد کا اظہار

تفصیلات کے  مطابق وزیر اعظم عمران خان سے ارکان قومی اسمبلی  نے ملاقاتیں کیں ہیں۔ان ملاقاتوں میں شیر اکبر خان، سلیم الرحمان، ظل ہما، چوہدری عامر سلطان چیمہ، ملک عمر اسلم خان، عثمان خان ترکئی، ارباب عامر ایوب، عمران خٹک، جاوید اقبال وڑائچ، عبدالمجید خان نیازی اور نیاز احمد جھاکڑ شریک ہوئے۔ معاون خصوصی ملک محمد عامر ڈوگر بھی ملاقاتوں میں موجود تھے۔اراکین نے  وزیر اعظم عمران خان  پر مکمل اعتماد کا اظہار کیا ہے۔

وزیر اعظم عمران خان  نے کہا کے پی ٹی آئی حکومت نے عوامی فلاح کے لیے انقلابی اقدامات کئے ہیں۔ کامیاب پاکستان پروگرام کے ذریعے نوجوانوں، خواتین، غریب اور متوسط افراد کے لیے بلا سود قرضے فراہم کئے جارہے ہیں۔ احساس پروگرام کے تحت رعایت راشن، تعلیمی وظائف، ایمرجنسی کیش، زچہ بچہ کی نشونما، خصوصی افراد کی کفالت، پناہ گاہیں اور خواتین کے لیے سنٹر بنائے گئے ہیں۔

وزیر اعظم کا کہنا تھا کہ  بین الاقوامی منڈی میں قیمتیں بڑھنے کے باوجود عوام کو ریلیف مہیا کرنے کی خاطرحکومت پیٹرول اور ڈیزل پر بھاری سبسڈی دے رہی ہے۔ یہ وہ تمام اقدامات ہیں جو پہلے کسی بھی حکومت نے نہیں اٹھائے۔  موجودہ سیاسی صورتحال میں پی ٹی آئی کو عوام کا  اعتماد حاصل ہے۔

وزیر اعظم کی اراکین قومی اسمبلی کو اپنے حلقوں میں عوامی رابطے تیز کرنے اور ان کے مسائل  فوری حل کرنےکی تلقین۔