انگلینڈ میں کورونا وائرس سے متعلق تمام پابندیاں ختم

غیرملکی میڈیا کے مطابق برطانیہ میں ایسٹرکی چھٹیوں سے قبل تمام سفری پابندیاں ختم کرنے کا اعلان کردیا ۔ 

دنیا بھر سے انگلینڈ آنے والے مسافروں کے لئے منفی کوویڈ ٹیسٹ کی شرائط بھی ختم کردی گئی ہیں ، 18 مارچ سے لوکیٹر فارم کی شرائط بھی ختم ہوجائیں گی ۔ لوکیٹر فارم میں مسافروں کو سفری معلومات کے علاوہ برطانیہ میں اپنی رہائش گاہ کا ایڈریس دینا ہوتا تھا۔

برطانیہ آنے والے مسافروں کے لیے ویکسینیشن کی پابندی بھی ختم کردی گئی ہے۔ غیر ویکسین شدہ افراد کو سفر سے پہلے کورونا ٹیسٹ بھی نہیں کروانا پڑے گا اور نہ ہی مسافروں کو لوکیٹر فارم جمع کروانے کی ضرورت ہوگی۔

برطانوی وزیر ٹرانسپورٹ نے کہا  ہے کہ سفری پابندیاں ختم کرنے کا مطلب ہے کہ پرانے وقت کی طرح دوبارہ سفر کر سکیں گے۔

برطانیہ کی حکومت کی جانب سے یہ اعلان ایسے موقع پر آیا ہے جب ملک کے چاروں حصوں انگلینڈ، سکاٹ لینڈ، ویلز اور مشرقی آئرلینڈ میں جنوری کے بعد سے پہلی مرتبہ کورونا کے کیسز میں اضافہ ہو رہا ہے۔

خیال رہے کہ اس سے پہلے برطانیہ نے قرنطینہ  کی پابندی بھی ختم کر دی  تھی۔