نہ صرف تحریک عدم اعتماد ناکام ہوگی بلکہ اپوزیشن 2023ء کا الیکشن بھی ہارے گی:وزیراعظم

وزیر اعظم عمران خان کا پاکستان تحریک انصاف (پی ٹی آئی) کے اوورسیز کنونشن سے خطاب کرتے ہوئے کہنا تھا کہ آج حزب اختلاف کی جماعتوں کا شکریہ ادا کرتا ہوں جنہوں نے لوگوں کو ٹماٹر اور پیاز کی قیمتیں بھلا دیں۔

انہوں نے کہا ہے کہ ایک منصوبہ انسان بناتا ہے اور ایک منصوبہ اللہ بناتا ہے،مہنگائی کا رونا رونے والے اچانک مہنگائی کو بھول گئے۔ میں غلط فہمی میں پڑ گیا تھا کہ شاید قوم ان کے ساتھ کھڑی ہو جائے گی لیکن یہ پاکستانی قوم کو نہیں جانتے۔

عمران خان کا کہنا تھا کہ فضل الرحمان کا  نام  ڈیزل مسلم لیگ ن نے رکھا تھا،آصف زرداری نے حدیبیہ ملز کیس نواز شریف کے خلاف بنایا۔

وزیر اعظم کا کہنا تھا کہ آج پاکستان کی فوج دنیا کی طاقتور ترین فوج ہے اور پاکستانی فوج طاقتور نہیں ہوتی تو آج ملک کے تین ٹکڑے ہو چکے ہوتے۔

ان کا کہنا تھا کہ بھارتیوں کو بہت اچھی طرح جانتا ہوں وہ مودی کی پالیسیوں کے خلاف ہیں، دُعا ہے بھارت میں درست قیادت آئے جو مسلمانوں کو برابر حقوق دے، بھارت 5 اگست والا فیصلہ واپس لے تو مذاکرات کے لیے تیار ہیں۔

انہوں نے کہا ہے کہ حزب اختلاف والے اپنا پیسہ بچانے کے لیے ملک کو بیچ  دیں گے، لیڈر جب پیسہ چوری کر کے باہر بھیجتا ہے تو اوورسیز پاکستانیوں کو دکھ ہوتا ہے۔

وزیراعظم نے کہا ہے کہ امریکا اپنے ملک میں بمباری اور ڈرون کی اجازت نہیں دیتا اور ہمارے ملک پر ڈرون حملے کیے جس میں کتنے بے گناہ مارے گئے جب کہ حکمران کچھ نہیں بولتے تھے جو کہ پیسے کے غلام ہیں، یہ لوگ اپنا پیسہ بچانے کے لیے ملک بیچ دیں گے، میں امریکا، برطانیہ اور بھارت کا مخالف نہیں، میں کسی ملک کے خلاف نہیں بلکہ اس کی پالیسیوں کے خلاف ہوں۔

ان کا مزید کہنا تھا کہ اوورسیز پاکستانی ملک کا اثاثہ ہیں، میں چاہتا ہوں اوورسیز پاکستانی ملک میں سرمایہ کاری کریں اسی لیے انہیں پانچ سال تک ٹیکس کی چھوٹ دی ہے۔