الیکشن کمیشن نے وزیراعظم کو سوات کا دورہ کرنے سے روک دیا

تفصیلات کے مطابق  الیکشن کمیشن آف پاکستان  نے وزیراعظم  عمران خان کو سوات کا دورہ کرنے سے روک دیا ہے،  ڈسٹرکٹ مانیٹرنگ آفیسر سوات سلیم اللہ نے 16 مارچ کو دورہ سوات  کو روکنے کے لئےنوٹس جاری کردیا ہے۔

ڈی ایم او کا کہنا ہے کہ  وزیراعظم  عمران خان  کا دورہ سوات ضابطہ اخلاق کی خلاف ورزی کے زمرے میں آتا ہے،  وزیراعظم پاکستان کو ان کے سیکرٹری کے ذریعے نوٹس بھجوا کر آگاہ کردیا گیا، خلاف ورزی کرنے پر قانونی کار روائی کی جائیگی۔

  ڈی ایم او سوات  نے کہا ہے کہ   عوامی عہدہ رکھنے والا شخص انتخابات والے اضلاع کا دورہ نہیں کرسکتا۔

واضح رہے کہ  ڈسٹرکٹ مانیٹرنگ آفیسر   کو جےیوآئی سوات نے وزیراعظم کے ممکنہ دورے کے خلاف درخواست دی تھی۔