یہ اپوزیشن کی سیاست کے آخری ایام ہیں:وفاقی وزیر اطلاعات

وفاقی دارالحکومت اسلام آباد میں دیگر وفاقی وزرا کے ہمراہ پریس کانفرنس کرتے ہوئے وفاقی وزیر فواد چودھری نے کہا ہےکہ ہمارے ڈی چوک کے جلسے سے گھبراہٹ شروع ہوچکی ہے، پریس کانفرنس میں ان کے ہمراہ اسد عمر، خسرو بختیار، فرخ حبیب اور عامر کیانی سمیت تحریک انصاف کے دیگر رہنما بھی موجود تھے۔

فواد چوہدری کا کہنا تھا کہ الیکشن کمیشن کو ن لیگ کی نظر لگ گئی ہے، انہیں صرف پی ٹی آئی نظر آتی ہے لیکن ہم ہر طرح سے تیار ہیں،اتحادیوں کی طرف سے امید ہے کہ وہ ساتھ دیں گے۔

فواد چودھری کا مزید کہنا تھا کہ اپوزیشن کبوتروں کی طرح پنجرے میں بند ہوگئی ہے، اپوزیشن کی سیاست کے آخری دن ہیں، پاکستان کو آج آزاد خارجہ پالیسی کی وجہ سے ایک شناخت ملی ہے۔

وفاقی وزیر اسد عمر کا کہنا تھا کہ اسلام آباد میں ڈی چوک پر تاریخی جلسہ ہوگا، جلسے کی تیاریوں سے متعلق ہم نے اہم میٹنگ کی ہے۔

ان کا کہنا تھا کہ جلسے سے متعلق سات انتظامی کمیٹیاں بنائی گئی ہیں جب کہ صوبائی صدور ضلعی سطح پر کمیٹیاں بنائیں گے اور 19 تاریخ سے ملک بھر میں ہماری تنظیمیں عوام کو متحرک کریں گی۔

اسد عمر کا مزید کہنا تھا کہ مسلمانوں کی فتح پر پوری دنیا کو مبارک باد پیش کرتے ہیں، وزیراعظم عمران خان نے اسلام کی بہت بڑی خدمت کی ہے، اب ہر سال 15 مارچ کو اسلاموفوبیا کے حوالے سے دن منایا جائے گا۔

وفاقی وزیر خسرو بختیار نے  پریس کانفرنس سے خطاب کرتے ہوئے کہا ہےکہ عمران خان ایک طرف اور پوری اپوزیشن دوسری طرف کھڑی ہے، صرف ایک شخص کی وجہ سے آج ساری اپوزیشن اکٹھی ہوگئی ہے۔

وفاقی وزیرخسرو بختیار کا مزید کہنا تھا کہ 27 مارچ کو پاکستان کی سیاست کا نئی جدت کے ساتھ آغاز ہوگا،اپوزیشن رہنماؤں کے درمیان نظریاتی اختلافات واضح ہو چکے ہیں۔