عالمی سطح پر اُمت مسلمہ کی قیادت کرنا پاکستان کی بڑی کامیابی ہے : فواد چوہدری 

تفصیلات کے مطابق وفاقی وزیر فواد چوہدری نے اپنے پیغام میں کہا ہے کہ عالمی سطح پر امت مسلمہ کی قیادت کرنا پاکستان کی بڑی کامیابی ہے ۔   امت مسلمہ کے تمام تر مسائل اس اجلاس میں زیر بحث آئیں گے جو کہ موجودہ حکومت کی بہت بڑی کامیابی ہے کہ  صرف تین ماہ میں دوسری مرتبہ او آئی سی وزراء خارجہ کانفرنس کے انعقاد کا اعزاز حاصل ہوا۔

انہوں نے کہا کہ  کانفرنس میں مسلم امہ کے مسائل زیر بحث ہیں، شرکاء کی تقاریر جاری ہیں، کانفرنس میں تقریباً 32 وزراء خارجہ اور 700 سے زائد مندوبین شریک ہیں۔ 

چوہدری فواد حسین  نے کہا کہ پاکستان کے ہر فرد کو فخر ہونا چاہئے کہ آج پاکستان مسلم امہ کی قیادت کر رہا ہے۔  انہوں نے کہا کہ مندوبین ہمارے سیاسی حالات کو نظر انداز کرتے ہوئے کانفرنس میں شرکت کے لئے آئے ہیں جو پاکستان کے لئے عزت کا باعث ہے،  اپوزیشن جماعتوں خصوصاً ان لوگوں جنہوں نے کانفرنس کو ناکام کرنے کی کوشش کی،ان  کو خصوصی مبارکباد پیش کرتا ہوں کہ یہ کانفرنس کامیابی سے جاری ہے۔ 

واضح رہے کہ اسلامی تعاون تنظیم (او آئی سی) کے وزرائے خارجہ کی کونسل (سی ایف ایم) کا 48 واں اجلاس جاری ہے ، اجلاس میں 57  ممالک کے وزرائے خارجہ موجود ہیں، ان کے علاوہ صدر پاکستان ڈاکٹر عارف علوی، وزیراعظم عمران خان، وفاقی وزرا اور اہم شخصیات بھی اجلاس میں شریک ہیں۔
اجلاس مسلم ممالک کی 57 رکنی کونسل کا دو روزہ سالانہ اجلاس ’اتحاد، انصاف اور ترقی کے لیے شراکت داری کی تعمیر‘ کے موضوع کے تحت منعقد ہو رہا ہے۔