اجلاس میں ہونے والی گرما گرمی، آصف علی زرداری کی مریم نواز سے معذرت

تفصیلات کے مطابق پی ڈی ایم کے سربراہی اجلاس میں آج گرما گرمی دیکھنے کو ملی، اجلاس میں گفتگو کے دوران سابق صدر آصف علی زرداری نے نواز شریف کو مخاظب کرتے ہوئے کہا تھا کہ یہ پہلی بار نہیں ہے کہ جمہوری قوتوں نے دھاندلی کا سامنا کیا ہے، میں نے اپنی زندگی کے 14 برس جیل میں گزارے ہیں، میاں صاحب پلیز پاکستان تشریف لائیں، ہم نے سینیٹ انتخابات لڑے اور سینیٹر اسحاق ڈار ووٹ ڈالنے نہیں آئے، آصف زرداری نے نواز شریف کو  کہاکہ  اگر لڑنا ہے تو ہم سب کو جیل جانا پڑے گا۔جس پر مریم نواز نے جواب دیا تھا کہ  نیب کی تحویل میں میاں صاحب کی زندگی کو خطرہ ہے،وہ پاکستان واپس کیسے آئیں ۔ آصف زرداری گارنٹی دیں کہ میرے والد کی جان کو پاکستان میں خطرہ نہیں ہوگا؟

آصف زرداری اور مریم نواز شریف کی مابین ہونے والی اس گرما گرمی کے بعد سابق صدر آصف  زرداری نے مریم نواز سے معذرت کر لی ہے۔

یاد رہے  اجلاس میں آصف زرداری نے نواز شریف سے گفتگو کرتے ہوئے  کہا تھا کہ  جب 1986 اور 2007 میں شہید بی بی وطن آئیں تو ہم نے پورے ملک کو موبلائز کیا تھا،ہمیں لانگ مارچ کی ایسی ہی منصوبہ بندی کرنا ہوگی کہ جیسے 1986 اور 2007 میں شہید بی بی کی آمد پر کی تھی، مجھے اسٹیبلشمنٹ کا کوئی ڈر نہیں تاہم اسٹیبلشمنٹ کے خلاف جدوجہد ذاتی عناد کے بجائے جمہوری اداروں کے استحکام کی جدوجہد کیلئے ہونا چاہیے، میاں صاحب، آپ کیسے عوامی مسائل حل کریں گے؟ آپ نے اپنے دور میں تنخواہوں میں اضافہ نہیں کیا، میں نے اپنے دور میں تنخواہوں میں اضافہ کیا۔

آصف زرداری نے کہا تھا کہ  میں جنگ کے لئے تیار ہوں مگر شاید میرا ڈومیسائل مختلف ہے، میاں صاحب آپ پنجاب کی نمائندگی کرتے ہیں،  میں نے 18ویں آئینی ترمیم اور این ایف سی منظور کیا جس کی مجھے اور میری پارٹی کو سزا دی گئی،ہم اپنی آخری سانس تک جدوجہد کے لئے تیار ہیں، اسمبلیوں کو چھوڑنا اسٹیبلشمنٹ اور عمران خان کو مضبوط کرنے کے مترادف ہے۔ایسے فیصلے نہ کئے جائیں کہ جس سے ہماری راہیں جدا ہوجائیں، ہمارے انتشار کا فائدہ جمہوریت کے دشمنوں کو فائدہ دے گا،پاکستان پیپلزپارٹی ایک جمہوری پارٹی ہے، ہم پہاڑوں پر سے نہیں بلکہ پارلیمان میں رہ کر لڑتے ہیں۔