پنجاب اسمبلی میں نئے قائد ایوان کا چناؤ آج ہو گا

تفصیلات کے مطابق حکومتی اتحاد کے چودھری پرویز الٰہی اور متحدہ اپوزیشن کے حمزہ شہباز کے درمیان کانٹے کا مقابلہ ہے ۔   

اجلاس کے ایجنڈے کے مطابق ہدایت کی گئی ہے کہ کوئی ممبر موبائل فون ہاؤس میں لے کر نہیں جائے گا، تمام ارکان اپنے فون باہر سیکیورٹی کو جمع کرائیں گے۔

یہ ہدایت بھی کی گئی ہے کہ خواتین ارکان اپنے ہینڈ بیگ سیکیورٹی کو جمع کرائیں گی، ارکانِ اسمبلی شناختی کارڈ اور اسمبلی کارڈ لازمی ساتھ لائیں گے۔

371 کے ایوان میں وزیر اعلیٰ بننے کیلئے 186 ووٹ درکار ہوں گے ، ہاؤس میں تحریک انصاف کے اراکین کی تعداد 183 ہے جبکہ پی ٹی آئی کے 183 میں سے 20 کے قریب اراکین ترین اور علیم گروپ کا حصہ ہیں۔

ذرائع کے مطابق مسلم لیگ ن کی پنجاب اسمبلی میں 165 نشستیں ہیں جبکہ مسلم لیگ ق اور پیپلز پارٹی کے بالترتیب 10 اور 7 ممبران ہیں۔ ہاؤس میں چودھری نثار علی خان اور جگنو محسن سمیت 5 آزاد امیدوار بھی ہیں جبکہ رائے حق پارٹی کی 1 نشست مولانا معاویہ اعظم طارق کے پاس ہے۔  

تحریک انصاف کے منحرف ترین گروپ اور عبدالعلیم خان گروپ حمزہ شہباز کو ووٹ ڈالیں گےرائے حق پارٹی کے مولانا معاویہ اور آزاد امیدوار بلال اصغر حمزہ شہباز کو ووٹ ڈالیں گے۔

ذرائع کے مطابق ترین گروپ کے بعض اراکین چودھری پرویز الٰہی کیساتھ بھی مل گئے، مسلم لیگ ن کا منحرف گروپ بھی چودھری پرویز الٰہی کو ووٹ کاسٹ کرے گا۔ 

گزشتہ روز نئے وزیرِ اعلیٰ پنجاب کے انتخاب کے معاملے پر ہونے والا پنجاب اسمبلی کا اجلاس 3 گھنٹے 53 منٹ کی تاخیر سے شروع ہوا اور کچھ دیر بعد ہی ملتوی کر دیا گیا تھا۔

پنجاب اسمبلی کے اسپیکر چوہدری پرویز الہٰی نے اجلاس کی صدارت کی، جس کے بعد اجلاس میں مرحوم رکنِ اسمبلی کے لیے فاتحہ خوانی ہوئی۔

اجلاس میں اسپیکر نے آئین کے آرٹیکل 133 کے تحت وزیرِ اعلیٰ کے انتخاب کے لیے کاغذاتِ نامزدگی سیکریٹری اسمبلی سے حاصل کرنے کی ہدایت کی تھی۔