شمالی وزیرستان میں فوجی قافلے پر حملہ، 7 جوان شہید

آئی ایس پی آر کے مطابق دہشت گردوں نے فوجی قافلے پر حملہ گزشتہ روز ایشام کے علاقے میں کیا، دہشت گردوں کے حملے میں پاک فوج کے 7 جوان شہید جبکہ سکیورٹی فورسز کی جوابی کارروائی میں 4 دہشت گرد ہلاک ہوئے۔ 

پاک فوج کے شعبہ تعلقات عامہ کے مطابق شہید ہونے والے فوجی جوانوں میں حوالدار طارق یوسف، سپاہی سلیمان وقاص، سپاہی جنید علی، سپاہی اعجاز حسین، وقار احمد، جواد امیر اور ارشد علی کے نام شامل ہیں۔

ترجمان پاک فوج کے مطابق دہشت گردوں کے خاتمے کے لیے علاقے میں کلیئرنس آپریشن جاری ہے، پاک فوج دہشت گردی کی لعنت کو ختم کرنے کے لیے پُرعزم ہے، ہمارے بہادر جوانوں کی قربانیاں عزم کو مزید مضبوط کرتی ہیں۔