پاکستان اور افغانستان کے درمیان 3 ٹی ٹوئنٹی میچز کی سیریز کا پہلا میچ آج شارجہ میں کھیلا جائے گا جبکہ دوسرا اور تیسرا ٹی ٹوئنٹی 26 اور 27 مارچ کو ہوگا، تمام میچز رات 9 بجے شروع ہوں گے۔

دونوں ٹیموں کے درمیان ہونے والی ٹی ٹوئنٹی سیریز کی ٹرافی کی رونمائی کردی گئی ہے، پاکستان کے کپتان شاداب خان اور افغانستان کے کپتان راشد خان نے ٹرافی کی رونمائی کی۔

🇵🇰 🏆 🇦🇫#AFGvPAK pic.twitter.com/H8XjcZArh0

— Pakistan Cricket (@TheRealPCB) March 23, 2023

 افغان کرکٹ بورڈ کے مطابق ٹرافی افغان فنِ ثقافت اور دستکاری کی بہترین مثال ہے جو کہ ہاتھ سے بنائے گئے قالین سے تیار کی گئی اور ہمارے شاندار افغان ورثے اور روایات کی عکاسی کرتی ہے۔

دوسری جانب قومی ٹی 20 کرکٹ ٹیم کے کپتان شاداب خان نے سیریز میں کامیابی کے عزم کا اظہار کرتے ہوئے کہا ہے کہ سیریز کے دوران بے خوف  ٹیم کو لیڈ کروں گا، افغانستان ٹیم کے کھلاڑی ہر لیگ میں کھیلتے ہیں اور امارات کی کنڈیشن میں وہ بہت خطرناک ٹیم ہے۔

 شاداب نے مزید کہا کہ سینئر کھلاڑیوں کے کم بیک پر اور نوجوان کھلاڑیوں پُرجوش ہیں، رمضان میں فینز ٹیم کیلئے دعائیں کریں، ہم کوشش کریں گے کہ اچھی کرکٹ کھیلیں۔

 یاد رہے کہ افغانستان سے سیریز کیلئے پاکستان کرکٹ ٹیم بدھ کی رات دبئی پہنچی تھی جہاں ٹیم کا شاندار استقبال کیا گیا تھا۔

سرکاری خبررساں ادارے اے پی پی کے مطابق بھارت، روس  سمیت مختلف ممالک میں قائم پاکستانی سفارت خانوں میں یوم پاکستان کے  موقع پر پرچم کشائی کی تقاریب ہوئیں اور قومی ترانہ پڑھا گیا۔

ان تقاریب میں سفارت خانوں کے ملازمین، ان کے اہلخانہ اور پاکستانی برادری نے بھرپور انداز میں شرکت کی۔ اس موقع پر ملکی سلامتی اور ترقی و خوش حالی کے لیے خصوصی دعائیں کی گئیں۔

بھارت میں پاکستانی  ہائی کمیشن میں ناظم الامور سلمان شریف نے پرچم کشائی کی۔  اس موقع پر صدرمملکت ڈاکٹرعارف علوی اور وزیراعظم محمد شہباز شریف کے خصوصی پیغامات پڑھ کر سنائے گئے  جن میں انہوں نے قوم کو یوم پاکستان کی مبارکباد پیش کی اور بانی پاکستان سمیت دیگر ولولہ انگیز قیادت کو خراج عقیدت پیش کیا گیا۔

اس موقع پر قرارداد پاکستان کی منظوری اور قیام پاکستان کی جدوجہد  کے حوالے سے خصوصی دستاویزی پروگرام دکھائے گئے۔

ماسکو میں پاکستان کے سفیر شفقت علی خان کے زیرصدارت یوم پاکستان کی  تقریب ہوئی اور قومی پرچم لہرایا گیا۔ برسلز میں ناظم الامورسید فراز حسین زیدی نے  یون پاکستان کے موقع پر پرچم کشائی کی۔

دبئی میں پاکستانی سفیر فیصل نیاز ترمذی نے قومی پرچم لہرایا اور یوم پاکستان کی اہمیت  کو اجاگر کیا۔

مصرمیں یوم پاکستان کے موقع پر پاکستانی سیفرساجد بلال نے پرچم کشائی کی۔

اسلام آباد: سپیکر قومی اسمبلی راجہ پرویزاشرف نے کہا ہے کہ یوم پاکستان تجدید عہد وفا کا دن ہے،ہمیں آپس کے اختلافات کو بھلا کر ملک کی تعمیر و ترقی کے لیے کردار ادا کرنے کی ضرورت ہے،پارلیمنٹ ہی واحد ادارہ ہے جہاں تمام مسائل کے حل کے لیے بات چیت کی جا سکتی ہے۔

یوم پاکستان کے موقع پر قوم کے نام مبارکباد کے پیغام میں انہوں نے کہا کہ یوم پاکستان تجدید عہد وفا کا دن ہے، 23مارچ1940 کادن برصغیر کی تاریخ میں ایک منفرد مقام رکھتا ہے، آج ایک پھر اسی جذبے کو دہرانے کی ضرورت ہے۔

سپیکر قومی اسمبلی نے کہا کہ آج سے 83 سال قبل جنوبی ایشیا کے مسلمانوں نے علیحدہ وطن کے لیے جدو جہد کی تھی،قرارداد لاہور کو منظوری کے بعد قرارداد پاکستان کا نام دیا گیا جس نے مسلمانوں کو نئی سمت اور سوچ دی اور تحریک آزادی کو نیا جوش اور ولولہ بخشا۔

راجہ پرویز اشرف نے کہا کہ قائدا عظم نے اسلام کے امن و برداشت اور انسانیت سے محبت کے اصول کو اپنا شعار بنایا،ان کی ولولہ انگیز قیادت سے برصغیر میں بسنے والی دیگر اقلیتیں بھی متاثر ہوئیں جو قائد کی مدبرانہ قیادت اور مقصد کے حصول سے سچی لگن کا کمال تھا،ہمیں بھی آپس کے اختلافات کو بھلا کر ملک کی تعمیر و ترقی کے لیے کردار ادا کرنے کی ضرورت ہے۔

سپیکر قومی اسمبلی نے کہاکہ ہمیں قائد اعظم کے اتحاد، یقین اور تنظیم کے رہنما اصولوں کو اپنانے کا عہد کرنا ہوگا، مملکت خداداد پاکستان اس وقت شدید بحرانوں سے گزر رہی ہے جن سے نبردآزما ہونے کے لیے ہمیں سیاسی اختلافات کو بھلانا ہو گا۔

سیاستدانوں کو ملک اور قوم کے لیے اجتماعی سوچ اپنانا ہو گی۔ راجہ پرویز اشرف نے کہاکہ ملک کا معاشی استحکام سیاسی استحکام سے جڑا ہوا ہے، پارلیمنٹ ہی واحد ادارہ ہے جہاں تمام مسائل کے حل کے لیے بات چیت کی جا سکتی ہے، دنیا میں موجود تنازعات کا حل بات چیت سے ہی ممکن ہو سکتا ہے۔