ملک کو انارکی سے بچانا ہے تو فوری الیکشن کرائے جائیں: شیخ رشید

عوامی مسلم لیگ کے سربراہ شیخ رشید نے ایبٹ آباد کے کالج گراؤنڈ میں تحریک انصاف کے زیر اہتمام جلسہ عام سے خطاب کرتے ہوئے کہا کہ عوام کو کہتا ہوں عمران خان کی کال پر نکلیں، اسلام آباد پہنچیں اور جہاں آپ کو روکا جائے وہاں پر ہی بیٹھ جائیں۔

انہوں نے عوام سے پُرزور اپیل کرتے ہوئے کہا کہ عمران خان کی کال پر لیبک کہیں، اگر اس بار وہ اپنے حق کے لیے باہر نہ نکلیں تو ملک سے غداری کریں گے۔

شیخ رشید نے کہا کہ کل مریم نواز نے غیرپارلیمانی زبان استعمال کی، نواز شریف بھی چودہ بار فوج کے خلاف تنقید کرچکے ہیں، میں پوچھنا چاہتا ہوں کہ فوج نے ان کے خلاف ایکشن کیوں نہ لیا؟ ہم افواج پاکستان کو ہم اس ملک کی ضامن سمجھتے ہیں۔

سابق وزیر داخلہ نے کہا کہ میں نے سنا ہے مجھ پر ایک اور مقدمہ دائر کرنے کی تیاری کی جارہی ہے، جتنے چاہیں مجھ پر مقدمات بنا لیں ، میں ان سے نہیں گھبراتا، عمران خان کے ساتھ وفادار رہوں گا چاہے جان چلی جائے۔

انہوں نے فوری الیکشن پر زور دیتے ہوئے کہا کہ ملک کو انارکی سے بچانا ہے تو فوری الیکشن کرائے جائیں کیونکہ موجودہ صورت کا واحد حل فوری الیکشن ہے۔