ہم کسی سپر پاور کو نہیں مانتے:عمران خان

سابق وزیر اعظم عمران خان نے ایبٹ آباد میں جلسہ عام سے خطاب کرتے ہوئے کہا کہ مسلمان قوم گواہی دیتی ہے کہ اللہ کے سوا کسی کے آگے نہیں جھکتی۔

انہوں نے کہا کہ روس سستی گندم،سستے پیٹرول اور سستے ڈیزل کے لیے گیا تھا کیونکہ میرا مقصد تو میری قوم ہے، میں اپنی قوم کے مفادات کو امریکہ کے لیے قربان کیوں کروں۔

عوام سے خطاب میں انہوں نے کہا کہ آج میں آپ کے پاس کسی خاص مقصد سے آیا ہوں، میں 20 تاریخ کے بعد اسلام آباد کی کال دوں گا، اسلام آباد میں انسانوں کا جنون آنے والا ہے، شہباز شریف جتنے مرضی کنٹینر کھڑے کر لے، 20 لاکھ سے زائد لوگ اسلام آباد آئیں گے۔

چیئرمین تحریک انصاف نے کہا کہ اسلام آباد مارچ کے شرکاء کی ایک ہی آواز ہوگی، حقیقی آزادی چاہیے، امپورٹڈ حکومت نامنظور، امریکی سازش سے مسلط کیے گئے کرپٹ مافیا کو پاکستانی قوم کبھی تسلیم نہیں کرے گی۔ 

ان کا کہنا تھا کہ امریکی چیری بلاسم جیسا وزیراعظم چاہتے تھے جو انہیں شہباز شریف کی صورت میں مل گیا، شہبازشریف کہتا ہے کہ بیگرز آر ناٹ چوزرز، شہبازشریف تم بھکاری ہو،تم بزدل،تم ڈاکو ہو، تمہاری چوری کا پیسہ ملک سے باہر پڑاہے، شہبازشریف سن لو ہم تمہاری اور تمہارے خاندان کی بیرون ملک رکھی گئی، لوٹی ہوئی رقم کے تحفظ کی خاطر امریکہ کی غلامی برداشت نہیں کریں گے۔

اپنے خطاب میں منحرف اراکین سے متعلق بات کرتے ہوئے سابق وزیر اعظم نے کہا کہ خیبرپختونخوا میں صرف ایک لوٹا نکلا، مجھے بتایا گیا ہے کہ ابھی تک اس نے پشاور آنےکی جرات نہیں کی، یہ لوٹے جدھر بھی جائیں گے، دو نعرے لگیں گے، ایک ضمیرفروش چور، دوسرا غدار کا نعرہ لگے گا، یہ 2022ء کا پاکستان ہے،ہماری یوتھ باشعور ہے،بڑوں کو چھوڑیں بچوں کو بھی پتا ہے کہ لوٹا کیا ہوتا ہے،یہ جہاں جائیں گے ان کے خلاف نعرے لگیں گے۔

سابق وزیر اعظم عمران خان نے کہا کہ نیوٹرل بننے کی اللہ نے ہمیں اجازت نہیں دی، بار بارکہتا ہوں، نیوٹرل جانور ہوتے ہیں، انسان نے تو اللہ کو جواب دینا ہوتا ہے۔

انہوں نے کہا کہ جب سے امپورٹڈ حکومت آئی ہے ساری چیزوں کی قیمتیں بڑھ گئی ہیں، میڈیا سےگزارش ہےکہ اب بھی مائیک لے کردکانوں میں جائیں اور وہاں گھی کی قیمت ہی معلوم کرلیں، ہماری حکومت میں توآپ مائیک لےکردکانوں میں جاتےتھےکہ کہاں ہے نیا پاکستان۔

اپنے خطاب میں ان کا کہنا تھا کہ میر جعفر مسلمانوں کے گورنر سراج الدولہ کا سپہ سالار تھا،کمانڈر انچیف تھا،اس نے انگریزوں کے ساتھ مل کر سراج الدولہ سے غداری کی تھی اور مسلمانوں کو شکست ہوئی تھی۔