عمران خان کے فوج مخالف بیانات پر قومی اسمبلی میں مذمتی قرارداد منظور

تفصیلات کے مطابق ن لیگ کے ممبر قومی اسمبلی جاوید عباسی نے قرارداد پیش کی جس میں کہا گیا کہ عمران خان نے اپنے بیان میں تاریخی حقائق کو مسخ کرنے اور مسلح افواج کو بدنام کرنے کی کوشش کی ہے۔

سابق وزیر اعظم عمران خان کے خلاف مذمتی قرار داد میں کہا گیا کہ یہ ایوان چیئرمین پاکستان تحریک انصاف اور سابق وزیراعظم عمران خان کے بیان کی شدید مذمت کرتا ہے جس میں انہوں نے تاریخی حقائق کو توڑ مروڑ کر پیش کرتے ہوئے پاکستان کی مسلح افواج پر الزام لگا ئے۔

کہا گیا کہ پاکستان کی مسلح افواج ملکی سرحدوں کا بلا خوف و خطر تحفظ کر رہی ہیں اور دہشت گردی کےخلاف بے شمار قربانیاں دی ہیں، سیاسی مقاصد کے لیے ادارے کو بدنام کرنے کی کوشش ملکی مفاد کے خلاف ہے۔

دوسری جانب پاکستان تحریک انصاف کی جانب سے قومی اسمبلی کی قرار داد کی شدید مذمت کی گئی ہے، اس ضمن میں سابق وزیر اطلاعات فواد چودھری نے کہا کہ اس قراداد کو اسمبلی کی قراداد قرار دینا پارلیمان کی توہین ہے۔

ٹوئیٹر پر جاری پیغام میں رہنما تحریک انصاف نے کہا کہ مقبوضہ اسمبلی سے قرارداد منظور ہونا ایسے ہی ہے جیسے شریف اور زرداری فیملی گھر میں بیٹھ کر فیصلے کر لیں، اس اسمبلی میں اور ان کے گھر میں صرف بلڈنگ کا فرق ہے۔