اسپیکر پنجاب اسمبلی کا قائم مقام گورنر بننے سے انکار

میڈیا ذرائع کے مطابق ترجمان مسلم لیگ ق کا کہنا ہے کہ گورنر ہاؤس کا عملہ پنجاب اسمبلی میں سمری پر دستخط کے لیے آیا تھا جسے واپس بھیج دیا گیا ہے۔

ترجمان ق لیگ نے کہا کہ گورنر ہاؤس کے باہر جتنی پولیس تعینات ہے ایسی صورت حال میں وہاں کون جائے گا۔

بتایا گیا ہے کہ اس سے قبل اسپیکر پنجاب اسمبلی چودھری پرویز الٰہی اور عمر سرفراز چیمہ کے درمیان اہم ٹیلی فونک رابطے بھی ہوتے رہے ہیں جن میں دونوں رہنماؤں نے مشترکہ لائحہ عمل تیار کرنے پر اتفاق کیا۔

واضح رہے کہ گزشتہ روز صدر پاکستان ڈاکٹر عارف علوی نےگورنر پنجاب عمر سرفراز چیمہ کو ہٹانےکی وزیراعظم کی ایڈوائس مسترد کردی تھی۔

صدر کی جانب سے گورنر پنجاب کو ہٹانے کی ایڈوائس مسترد کرنے کے باوجود حکومت پاکستان نے گورنر پنجاب عمر سرفراز چیمہ کو عہدے سے ہٹانے کا نوٹیفکیشن جاری کردیا۔

عمر سرفراز چیمہ نے حکومتی نوٹیفکیشن پر ردعمل دیتے ہوئے کہا کہ صدر نے غیر معمولی حالات کے پیش نظرسمری مسترد کی، کیبنٹ ڈویژن نےمجھے ہٹانے کا غیر آئینی نوٹی فکیشن جاری کیا جس کو مسترد کرتا ہوں۔