ن لیگ کے وقت میں سی پیک کے تحت نہ کوئی صنعت لگی نہ کوئی نیا زون بنا:اسد عمر

میڈیا رپورٹس کے مطابق سابق وفاقی وزیر اور تحریک انصاف کے سینیئر رہنما اسد عمر نے کہا کہ زراعت،سائنس و ٹیکنالوجی اور آئی ٹی کو عمران خان کے دور میں سی پیک کا حصہ بنایا گیا، سڑکوں اور مغربی راہداری کی تعمیر کا کام سب سے زیادہ عمران خان کے دور میں ہوا،ن لیگ کے دور میں تو ترسیل کا نظام سرے سے بنایا ہی نہیں گیا۔

انہوں نے کہا کہ پچھلے سال 10 سالوں میں پہلی مرتبہ تحریک انصاف کے دور میں  تمام وفاقی بجٹ استعمال ہوا،5 سال میں ن لیگ سےکبھی وفاقی ترقیاتی بجٹ پورا استعمال نہیں ہوا،جولائی تا مارچ کے دوران استعمال شدہ ترقیاتی بجٹ کا حجم گزشتہ سال سے 28 فیصد زیادہ ہے،لگتا تو نہیں کہ یہ زیادہ دیر تک چل سکیں گے،اگر ان کی حکومت چلتی رہی تو دیکھتے ہیں کہ کتنا خرچ کرتے ہیں۔

رہنما تحریک انصاف نے کہا کہ ملکی ترقی ومعیشت کو امپورٹڈ حکومت کے مسلط ہونے سے زور دار بریک لگ گئی ہے،معیشت کا پہیہ چلانے کے لیے ملک میں فوری انتخابات کروانا لازم ہے۔

نوکریوں سے متعلق بات کرتے ہوئے ان کا کہنا تھا کہ ن لیگ نے اپنے 5 سالہ دور میں جتنی نوکریاں پیدا کیں تقریباً اتنی ہی تحریک انصاف نے اپنے 3 سال میں پیدا کیں۔

اسد عمر نے کہا کہ بلوچستان کو پاکستان کی تاریخ کا سب سے بڑا ترقیاتی بجٹ تحریک انصاف نے دیا،امید ہےکہ پاکستان کے ایک حصے کا خیال رکھنے والی حکومت اس کی راہ میں روڑے نہیں اٹکائے گی۔