سیالکوٹ کی ہر گلی جلسہ گاہ بنے گی، رکاوٹ ڈالی گئی تو انتظامیہ ذمہ دار ہو گی: شاہ محمود قریشی 

تفصیلات کے مطابق سابق وزیر خارجہ  اور پی ٹی آئی رہنما شاہ محمود قریشی  نے جی این این سے خصوصی  گفتگو میں کہا کہ سیالکوٹ میں جو کیا گیا اس کا کوئی جواز نہیں ،  پرامن جلسہ کرنا ہمارا قانون و آئینی حق ہے، اظہار رائے اور عوام سے رجوع کرنا ہمارا حق ہے، جس کو سلب نہیں ہونے دینگے۔ 

انہوں نے کہا کہ پنجاب میں یہ پہلا جلسہ نہیں، مختلف شہروں میں جلسے ہوئے،سندھ اور خیبرپختونخوا میں بھی پرامن جلسے ہوئے، ہم انتظامیہ کو درخواست دے چکے تھے ، رات تک انتظامیہ ہمارے ساتھ پلان تشکیل دے رہی تھی،یک دم یہ کیا ہوا ۔ سات گھنٹوں میں جگہ تبدیل کیسے ہوسکتی ہے ؟ ہمارے پلان بن چکے ہیں ایک دم اس میں تبدیلی کیسے کرسکتے ہیں ۔ 

شاہ محمود قریشی نے مزید کہا کہ  سمجھتا ہوں کہ یہ لندن کا نیا  پلان ہے جس پر آج سے عمل شروع کر دیا گیا، لندن میں جو پلان بنا  یہ اس کا آغاز ہے ، حکومت پنجاب سے گزارش ہے کہ  فیصلے پر نظرثانی کرے ، جلسہ تو ہونا ہے۔  اگر حکومت رکاوٹیں کھڑی کرے گی تو یہ  پنجاب کے حالات خود بگاڑ نا چاہتےہیں ، کئی جلسے ہوئے ہم نے کہیں توڑ پھوڑ نہیں کی،  پرامن جلسے کیے، لگتا یہ ہے کہ امپورٹڈ حکومت نے انتقامی کا رروائی کا آغاز کر دیا جس کا سیالکوٹ میں ٹریلر دکھائی دے رہا ہے۔ 

یہ جان بوجھ کر شرارت کی گئی ہے، یہ لندن میں بنایا گیا پلان ہے ، شاہ محمود قریشی کی جی این این این سے خصوصی گفتگو pic.twitter.com/TRwtPoO1Lh

— GNN (@gnnhdofficial) May 14, 2022

پی ٹی آئی رہنما نے کہا کہ  ہر صورت جلسہ کریں گے، ان کا مقابلہ کرینگے، پچھلے دس دن سے جلسہ گاہ پر بات چیت ہو رہی تھی،  اگر انتظامیہ کہتی کہ جلسہ کی جگہ تبدیل کریں اس پر بھی کوئی مسئلہ نہیں تھا  اور جان بوجھ کر شرارت کی گئی۔

شاہ محمود کا مزید کہنا تھا کہ اس سارے معاملہ پر پارٹی مشاورت کرے گی اور لائحہ عمل کا اعلان کریں گے، ہم آزادی کے لیے میدان میں رہیں گے، شام کو مقررہ وقت پر سیالکوٹ کی ہر گلی سے لوگ نکلیں گے۔ 

واضح رہے کہ سیالکوٹ میں سی ٹی آئی گراؤنڈ میں بلا اجازت تحریک انصاف (پی ٹی آئی) کے جلسہ کی تیاریوں پر پولیس نے رہنما تحریک انصاف عثمان ڈار سمیت کئی کارکنان کوگرفتار کر لیا ہے ۔