سیالکوٹ میں  پی ٹی آئی   کا جلسہ ، عثمان ڈار سمیت متعدد کارکنان گرفتار

جی این این کے مطابق پی ٹی آئی کے آج ہونے والے جلسے پر پولیس کا کریک ڈاؤن ،  پولیس نےجلسہ گاہ جانیوالےسارےراستےکنٹینرلگا کر بند کر دئیے ، ڈی پی اوسیالکوٹ خودآپریشن کی نگرانی کر رہےہیں۔ 

سیالکوٹ پولیس نےکرین کی مددسےجلسہ گاہ سےسامان ہٹادیا جلسہ گاہ سے سامان ہٹانے کے دوران تحریک انصاف کے کارکنوں نے مزاحمت کی، جس پر پولیس نے لاٹھی چارج کیا اور آنسو گیس کی شیلنگ کی۔ پولیس نے تحریک انصاف کے رہنما عثمان ڈار کے ہمراہ متعدد کارکنوں کو بھی گرفتار کرلیا ۔ جن میں صاحبزادہ حامدرضا،عمرڈار،علی اسجدملہی ، سابق ڈی جی اینٹی کرپشن اسلم گھمن سمیت40 سےزائدکارکن شامل ہیں ۔

ذرائع کے مطابق عثمان ڈارکوگرفتاری کےبعدنارووال جیل منتقل کیاجارہاہے۔ 

اس موقع پر عثمان ڈار کاکہنا تھا کہ عمران خان آج ضرورسیالکوٹ آئیں گے، جیل میں ڈالنے سے کپتان کی محبت کم نہیں ہوگی، ہم جیل سے باہر نکلیں گے، پھر جلسہ کریں گے،کارکن گھروں سے باہر نکلیں ۔  عمران خان کیساتھ کھڑے ہیں، جیلیں بھر دیں گے۔

دوسری جانب سیالکوٹ ڈپٹی کمشنر سیالکوٹ عمران قریشی  نے جلسہ گاہ میں جی این این سے خصوصی گفتگو کرتے ہوئے کہا کہ  پرائیویٹ جگہ پر جلسہ کرنے کی اجازت نہیں دے سکتے، تحریک انصاف کسی بھی اور جگہ جلسہ کرنا چاہے تو ہم وہ جگہ دینے کو تیار ہیں ۔ 

گزشتہ روز سیالکوٹ ضلعی انتظامیہ نے سی ٹی آئی گراؤنڈ میں جلسہ کرنے کی پی ٹی آئی کی درخواست مسترد کردی تھی۔