عمران خان نے پیٹرول پر سبسڈی دےکر عوام کے ساتھ دھوکہ کیا: مریم اورنگزیب

اسلام آباد میں پریس کانفرنس کرتے ہوئے وفاقی وزیر اطلاعات مریم اورنگزیب نے سابق ویر اعظم عمران خان کے حوالے سے کہا کہ جب آپ کو پتا چل گیا کہ شکست ہورہی ہےتوآپ نے پیٹرول پر غیرقانونی سبسڈی دی، عمران خان نے غیرقانونی سبسڈی دےکر عوام کے ساتھ دھوکا کیا۔

انہوں نے سابق وزیراعظم عمران خان کو مخاطب کرتے ہوئے کہا کہ جب آپ حکومت چھوڑکرگئے توایک ڈالر 189 روپے کا تھا، آج مہنگائی جس نہج پر ہے اس کا ذمہ دار عمران خان ہے۔

مریم اورنگزیب نے کہا کہ موجودہ مہنگائی کےاعمال نامے دراصل عمران خان کی وجہ سے ہیں، ہم عمران خان کی معاشی تباہ کاریوں سے عوام کو بچانے کی کوشش کر رہے ہیں۔

واضح رہے کہ اس وقت پیٹرول پر 21 روپے 30 پیسے اور ڈیزل پر 51 روپے 52 پیسے کی سبسڈی دی جا رہی ہے،حکومت نے پیٹرولیم مصنوعات کی قیمتوں پر دی جانے والی سبسڈی ختم  کرنے کا فیصلہ کیا ہے۔

ذرائع کے مطابق حکومت کی جانب سے پیٹرولیم مصنوعات کی قیمتوں پر دی جانے والی سبسڈی ختم کیے جانے کے بعد پیٹرول کی فی لیٹر قیمت میں 10 روپے اورڈیزل کی فی لیٹر قیمیت میں 15 روپے تک اضافے کا امکان ہے۔