آئندہ بجٹ غیر سودی پیش کیا جائے :سراج الحق

امیر جماعت اسلامی سراج الحق نے پریس کانفرنس سے خطاب میں کہا کہ اس وقت پاکستان سیاسی عدم استحکام سے دوچار ہے،غیر یقینی کی صورت حال ہے۔

انہوں نے کہا کہ ڈالر 200 کا سرخ ہندسہ کراس کرگیا ہے،ایک طرف مہنگائی ہے،دوسری طرف لوڈ شیڈنگ اور گرمی ہے،معاشی تباہی کی وجہ سودی نظام ہے۔

امیر جماعت نے کہا کہ قائد اعظم محمد علی جناح نے غیر سودی نظام معیشت کی بات کی،ابتدا سے لےکرآج تک سود کے خاتمے کی بات کی گئی،سود کے خلاف اعلیٰ عدالتیں فیصلے کرچکی ہیں مگر عمل نہیں کیا جارہا ہے۔

ان کا کہنا تھا کہ آج تک جتنے بھی حکمران آئے یا تو وہ خود سود خور تھے یا سود خوروں کے نمائندے تھے،وفاقی شرعی عدالت نے ستائیس رمضان کو ربا و سود ہر شکل میں ختم کرنے کا فیصلہ سنایا ہے۔

سراج الحق نے مطالبہ کیا کہ حکومت فوری طورپر سودی نظام کو ختم کرے،آئندہ بجٹ غیر سودی پیش کیا جائے،اسٹیٹ بینک تمام بینکوں کو ایک سال میں پچاس فیصد تک اسلامی بینکاری نظام نافذ کرے۔