مہنگائی کا طوفان لانے سے بہتر ہے حکومت چھوڑ دی جائے: مریم نواز

رہنما مسلم لیگ ن مریم نواز نے سرگودھا میں جلسے سے خطاب کرتے ہوئے کہا کہ نواز شریف دورمیں معیشت نے ترقی کی، کہا جاتا تھا نوازشریف کی سیاست ختم ہوگئی، آج نواز شریف کو کہا جا رہا ہے کہ واپس آؤ۔

مریم نواز نے کہا کہ پاکستان کی بدقسمتی تھی کہ ایک نااہل اور نالائق کو عوام پر مسلط کردیا گیا، ساڑھے 3 سال میں معیشت تباہ ہو کر وینٹی لیٹر پر چلی گئی ہے، عمران خان نے 4 سال سب کچھ تباہ کیا، اب کہتا ہے 4 ہفتے میں شہباز شریف نے کیا کیا، جھوٹے نے قتل کرنے کی سازش کا ڈراما لا کر بھی ثبوت نہیں دیا۔

حکومت میں رہنے یا نہ رہنے سے متعلق بات کرتے ہوئے مریم نواز نے جلسے کے شرکاء سے سوال کیا کہ حکومت میں رہنا چاہیے یا چھوڑ دینی چاہیے؟ اگر نواز شریف حکومت چھوڑتا ہے تو دوتہائی حکومت دو گے؟ شہباز شریف کرسی چھوڑ دے گا لیکن عوام کو مشکل میں نہیں ڈالے گا، شہباز شریف کہتا ہے کہ پیٹرول ایک روپیہ لیٹر بھی بڑھانا پڑتا ہے تو دل پر قیامت گزرتی ہے، میرے خیال میں تو ایسی حکومت چھوڑ دینا چاہیے۔

اپنے خطاب میں ان کا کہنا تھا کہ چار ہفتوں سے شہباز شریف کی حکومت ہے، عمران خان 40 تقریریں کرچکا ہے، ایک منٹ اپنی کارکردگی پر نہیں بول سکا، 35 پنکچر کا ڈراما لا کر بھی ثبوت نہیں دیا۔