ملک کے مختلف شہروں میں تحریک انصاف کے رہنماؤں اور کارکنان کے خلاف پولیس کا کریک ڈاؤن

حماد اظہر کے پولیس کی ریڈ پر سابق وزیر قانون فواد چودھری نے کہا کہ حماد اظہر کے گھر پر پولیس کا دھاوا اسلام آباد ہائی کورٹ کے فیصلے کی کھلی خلاف ورزی ہے، جو افسران بھی سیاسی کردار ادا کریں گے انہیں نتائج کا سامنا کرنا ہو گا۔

فواد چودھری نے کہا کہ اسلام آباد میں میرے گھر کی نگرانی کی جارہی ہے اور چھاپے کی پلاننگ ہے، حالات کے پیش نظر میں نے گھر چھوڑ دیا ہے اور اب جہلم پہنچوں گا،  تحریک انصاف کے کارکنوں پر مختلف شہروں میں آپریشن شروع ہو گیا ہے، فیصل آباد ، لاہور، ملتان ، سیالکوٹ اور جہلم سمیت دیگر شہروں میں کارکنوں اور لیڈرشپ پر چھاپوں کی اطلاعات ہیں، حکومت سیاسی خودکشی کر رہی ہے، ظلم کا یہ دور ختم ہونے کو ہے، ڈٹے رہو۔ 

رہنما تحریک انصاف شہباز گل نے حماد اظہر کے گھر رات گئے پولیس کے چھاپے کی مذمت کرتے ہوئے کہا کہ حماد اظہر ان کے باپ دادا نے ہمیشہ ایمانداری اور شرافت کی سیاست کی ہے، ان کے گھر پر پولیس گردی شرمناک ہے،ایسی حرکتوں سے آزادی مارچ اور بھی تگڑا ہو گا، حماد اظہر عوام کی بہت بڑی تعداد کے ساتھ لاہور سے نکلیں گے۔

فرخ حبیب نے تحریک انصاف کے رہنماؤں کے خلاف پولیس ایکشن پر کہا کہ تمام بیورکریسی اور پولیس کو پیغام دے رہے ہیں کرپٹ ڈاکو جو بیرونی سازش کی تحت اقتدار میں آئے ہےجنہوں ہیں ان کےغیر آئینی اورغیر قانونی احکامات تسلیم نہ کریں،جو ان کا ساتھ دےگاان کاساتھی تصور ہوگاپوری قوم آپ کو دیکھ رہی ہےحق اور سچ کاساتھ دیں۔

زرتاج گل نے پولیس کے کریک ڈاؤن پر کہا کہ امپورٹڈ حکومت اوچھے ہتھکنڈوں پر اتر آئی ہے،چادر اور چار دیواری کا تقدس پامال کرتے ہوئے میرے دیور کے گھر پر چھاپہ مارا اور گرفتار کرکے لے گئے،ہم ان اوچھے ہتھکنڈوں اور غنڈی گردی سے گھبرانے والے نہیں ہیں.

عثمان ڈار نے کہا کہ پولیس کا بدترین کریک ڈاؤن شروع ہو چکا ہے، بھاری نفری میری گرفتاری کے لیے سیالکوٹ جناح ہاؤس میں موجود ہے،امپورٹڈ حکومت کو  وارننگ دینا چاہتا ہوں کہ چادر اور چار دیواری کا تقدس ملحوظ خاطر رکھیں ورنہ بدمعاش حکومت کے ہر عمل کا پورا حساب چکائیں گے۔

واضح رہے کہ حقیقی آزادی مارچ کو روکنے کے لیے اس وقت ملک کے مختلف شہروں پاکستان تحریک انصاف کے رہنماؤں کے خلاف پولیس کا کریک ڈاؤن جاری ہے، تحریک انصاف رہنما فیاض الحسن چوہان، راشد حفیظ، راجہ ماجد، عدنان چودھری، سینیٹر اعجاز چودھری، میاں اسلم اقبال اور میاں محمود الرشید سمیت متعدد سینیئر رہنماؤں کے گھروں پر پولیس کے چھاپوں کا سلسلہ جاری ہے۔