حکومت اداروں کی تذلیل کی اجازت نہیں دے گی:مریم نواز

صوبائی دارلحکومت لاہور میں پریس کانفرنس کرتے ہوئے مریم نواز نے کہا کہ ادب کے ساتھ عدالتوں کو کہنا چاہتی ہوں ایسی روایت نہ ڈالیں، ایسا نہ کریں کہ جو شخص سب سے بڑھ کر اداروں کو گالیاں نکالے اسی کے حق میں فیصلے ہوں، عمران خان لانگ مارچ حکومت کے خلاف نہیں، اسٹیبلشمنٹ کے خلاف کر رہا ہے، آج جو کانسٹیبل شہید ہوا ہےاس کا ذمہ دارعمران خان ہے۔

انہوں نے کہا کہ حکومت سے نکالے جانے پر عمران خان کو صدمہ پہنچا،اس ملک کو سری لنکا بنانے کی کوشش کامیاب نہیں ہو گی، پنجاب میں جلسوں کے لیے جا رہی تھی یوں لگا کھنڈر میں جا رہی ہوں، پنجاب کے وزیراعلیٰ حمزہ شہباز ہیں اس کو جتنا بھی روک لیں وہی وزیراعلیٰ رہے گا، پاکستان کے وزیراعظم شہباز شریف ہیں اور وہی رہیں گے۔

مریم نواز نے سابق وزیر اعظم کو مخاطب کرتے ہوئے کہا کہ آپ کے 2014ء کے دھرنے کی وجہ سے چینی صدر پاکستان نہیں آ سکے تھے، عمران خان لانگ مارچ کااعلان کر کے پھنس گئے، عمران خان دھمکی ہمیں نہیں اسٹیبلشمنٹ کو دیتے ہیں، عمران خان نے ساری توجہ انتقام پر رکھی، عمران خان اکیلے 22 کروڑ عوام کی تباہی کے ذمہ دار ہیں، 17سال یا 70 سال عمر ہو جائے انسان کی خصلت نہیں بدلتی۔