پرامن احتجاج ہر سیاسی جماعت کا آئینی و جمہوری حق ہے:سراج الحق

امیر جماعت اسلامی سراج الحق نے سماجی رابطے کی ویب سائیٹ ٹوئیٹر پر جاری پیغام میں کہا کہ پرامن احتجاج ہر سیاسی جماعت کا آئینی و جمہوری حق ہے، سیاسی کارکنوں کے گھروں پر چھاپے نہ مارے جائیں، انہیں گرفتار نہ کیا جائے،چادر چار دیواری کا احترام کیا جائے، تشدد صورت حال کو مزید خراب کر دے گا۔

انہوں نے کہا کہ تینوں بڑی جماعتیں اور ان کے سرپرستوں کو موجودہ صورت حال کے ذمہ دار قرار دیا، کہا کہ اسلام آباد کے ڈرائنگ رومزمیں بیٹھ کر سیاست کرنے والے خطرناک کھیل کھیل رہے ہیں، اس کھیل کا ملک، آئین و جمہوریت اور سیاست کو نقصان ہوگا، سیاسی جماعتیں سری لنکا کی صورت حال سے عبرت حاصل کریں۔

امیر جماعت نے پنجاب پولیس کے نوجوان کی شہادت پر اظہار افسوس کرتے ہوئے کہا کہ اہل خانہ سے تعزیت کرتے ہیں، سیاسی پارٹیوں کے لیڈران اپنے کارکنوں کے رویوں کا جائزہ لیں، گالم گلوچ کی سیاست نے سیاسی ماحول کو دشمنی اور تشدد میں بدل دیا ہے، سنجیدہ طرز عمل نہ اپنایا گیا تو انارکی مزید بڑھے گی۔