اہلیان لاہور صبح 9 بجے بتی چوک پہنچیں:حماد اظہر

تفصیلات کے مطابق سابق وفاقی وزیر حماد اظہر نے تحریک انصاف کے زیر اہتمام حقیقی آزادی مارچ میں شرکت کے لیے کارکنان کو صبح 9 بجے بتی چوک پہنچنے کی ہدایت کی ہے۔

سماجی رابطے کی ویب سائیٹ ٹوئیٹر پر جاری پیغام میں رہنما تحریک انصاف نے کہا کہ 12 جماعتوں کی ایک عمران خان سے ٹانگیں کانپ گئی ہیں۔

انہوں نے اہلیان لاہور کو خصوصی ہدایت جاری کرتے ہوئے کہا کہ صبح 9 بجے بتی چوک پہنچیں، جی ٹی روڈ کے ذریعے اسلام آباد پہنچیں گے۔

12 جماعتوں کی ایک عمران خان سے ٹانگیں کانپ گئی ہیں۔
اہلیان لاہور، صبح ۹ بجے بتی چوک پہنچیں۔ جی ٹی روڈ کے ذریعے اسلام آباد پہنچیں گے انشاللہ۔

— Hammad Azhar (@Hammad_Azhar) May 24, 2022

واضح رہے کہ چیئرمین پاکستان تحریک انصاف نے 25 مئی کو اسلام آباد کی جانب حقیقی آزادی مارچ کی کال دے رکھی ہے، عمران خان خیبرپختوانخوا سے قافلے کی قیادت کرتے ہوئے اسلام آباد کی جانب مارچ کریں گے۔

حقیقی آزادی مارچ کوروکنے کے لیے پولیس نے تحریک انصاف کے کارکنان اور رہنماؤں کے خلاف ملک کے مختلف شہروں میں گزشتہ رات کریک ڈاؤن کیا جس میں کچھ کارکنان کی گرفتاریاں بھی عمل لائی گئیں۔ 

حکومت نے تحریک انصاف کے لانگ مارچ کے پیش نظر خیبر پختونخوا اور پنجاب سے اسلام آباد جانے والے راستوں کو بند کرنے کا حکم دے دیا ہے جبکہ شہر بھر میں 2 ماہ کے لیے دفعہ 144 نافذ کردی ہے۔

وزیر داخلہ رانا ثناء اللہ کا کہنا ہے کہ تحریک انصاف کا مارچ کسی صورت بھی اسلام آباد نہیں پہنچے گا، 10 بندے بھی اٹک پل کراس نہیں کرسکیں گے۔