بلوچستان کے 32 اضلاع میں بلدیاتی انتخابات ، پولنگ جاری

تفصیلات کے مطابق صوبہ بلوچستان  کے 32 اضلاع میں بلدیاتی انتخابات  کا  آغازہوگیا ، پولنگ بغیر کسی وقفی کے شام 5بجے تک جاری رہے گی ۔

 الیکشن کمیشن کا کہنا ہے کہ اس حوالے سے  تمام انتظامات مکمل کر لیے گئے ہیں۔ الیکشن کمیشن کی جانب سے صوبے بھر میں 5624 پولنگ اسٹیشن اور 13533 پولنگ بوتھ قائم کئے گئے ہیں۔ 

الیکشن کمیشن کے مطابق بلوچستان کے 32 اضلاع میں۔ 36لاکھ 10ہزار سے زائد افراد اپنا حق رائے دہی استعمال کریں گے جن میں  20 لاکھ 43ہزار828 مرد جبکہ15 لاکھ 70 ہزار896 خواتین ووٹرز شامل ہیں ۔ 

صوبے کے کل 6259وارڈز پر 17774 امیدواروں کے درمیان مقابلہ ہوگا جبکہ پہلے مرحلے میں 7میونسپل کارپوریشن، 838 یونین کونسل، 914 شہری وارڈ اور 5345 دیہی وارڈوں میںبلدیاتی انتخابات کا انعقاد ہوگا۔ 

دوسرے مرحلے میں چیئرمین ڈسٹرکٹ کونسل ،چیئرمین میونسپل کمیٹی اور چیئرمین یونین کونسلز کا انتخاب عمل میں لایا جائیگا۔ 

مجموعی طور پر 6259 وارڈ سے منتخب ہونیوالے کونسلرز ہی اپنے متعلق کمیٹی کے چیئرمین کا انتخاب کرینگے۔

الیکشن کمیشن  کے مطابق  میٹروپولیٹن کارپوریشن کوئٹہ اور لسبیلہ میٹروپولیٹن کارپوریشن سمیت دونوں اضلاع کے وارڈز میں انتخابات نہیں ہونگے۔ضلع موسی خیل پشین ژوب اور دیگر اضلاع میں 102 ارڈ پر بھی بلدیاتی انتخابات نہیں ہوں گے۔  ضلع کوئٹہ اور ضلع لسبیلہ میں حلقہ بندیوں کا عمل مکمل نہ ہونے کے باعث بلدیاتی انتخابات کا انعقاد نہیں کیا جارہا ہے ۔ 

بلدیاتی انتخابات کے لیے بلوچستان بھر میں سکیورٹی کے سخت انتظامات کیے گئے ہیں ،  الیکشن کمیشن نے دو ہزار کے قریب پولنگ سٹیشن کو حساس قرار دیا ہے۔