شاہ محمود قریشی کا نیب ترامیم کو عدالت میں چیلنج کرنے کا اعلان

تفصیلات کے مطابق اسلام آباد میں  پی ٹی آئی رہنما شاہ محمود قریشی نے پریس کانفرنس کرتے ہوئے کہا کہ نیب کے سیکشن 14 کا فائدہ نواز شریف کو ہوگا جبکہ نیب ترامیم کا مقصد پی پی اور ن لیگ کی قیادت کو بچانا ہے۔

شاہ محمود قریشی  کا کہنا ہے کہ نیب قوانین میں جو ترامیم کی گئی ہیں یہ وہی ہیں جو یہ ہم سے این ار او ٹو لینا چاہتے تھے۔

انہوں نے مزید کہا کہ نیب کی آزاد ادارے کی حیثیت کو کمپرومائز کیا گیا ہے، نیب کو اینٹی کرپشن پنجاب اور ایف آئی اے جیسا بنانے کی کوشش کی گئی ہے۔ 

شاہ محمود قریشی کاکہنا تھا  کہ یہ عارضی اور غیر فطری اتحاد ہے اور یہ گروپ عمران خان کو نیچا دکھانے کے لیے جمع ہوا ہے۔  

سابق وفاقی وزیر خارجہ شاہ محمود قریشی نے کہا کہ سپریم کورٹ کو اس معاملے پر ازخود نوٹس لینا چاہئے۔ 

شاہ محمود قریشی نے ایک سوال کے جواب میں کہا کہ عمران خان سے متعلق سوشل میڈیا پر وائرل مبینہ آڈیو کلپ  بے بنیاد ہے، سوال  ہی پیدا نہیں ہوتا کہ عمران خان ایسا کریں اور بولیں۔

واضح  رہے کہ دو روز قبل قومی اسمبلی نے نیب قوانین میں ترامیم اور الیکشن ترمیمی بل 2022 منظور کیا تھا، الیکشن ترمیمی کے تحت الیکٹرانک ووٹنگ مشین (ای وی ایم) اور اوورسیز ووٹنگ سے متعلق گزشتہ حکومت کی ترامیم ختم کردی گئی ہیں۔