نائجیریا : چرچ میں بھگدڑمچنے سے 31 افراد ہلاک

غیر ملکی خبر ایجنسی کے مطابق نا ئیجیریا کے جنوب میں واقع پورٹ ہار کورٹ شہر کے ایک چرچ میں منعقد ایک خیراتی تقریب کے دوران بھگدڑ مچنے سے 31 افراد جان سے ہاتھ دھو بیٹھے جن میں بچے بھی شامل ہیں ۔

پولیس کے مطابق پروگرام ریورز سٹیٹ میں کنگ اسمبلی پینٹیکوسٹل چرچ میں مستحق افراد کے لیے ہونے والے سالانہ ’شاپ فار فری‘ پروگرام کا اہتمام کیا گیا تھا۔ اس حوالے سے پولیس  ترجمان گریس ایرنگ کوکو نے بتایا  کہ ہفتہ کوعلی الصباح چرچ میں کھانا وصول کرنے  کیلئے  آنے والے سینکڑوں  افراد ایک گیٹ پر ٹوٹ پڑے جس کے نتیجے میں بھگدڑ  مچی ۔ کچھ لوگ پہلے سے وہاں موجود تھے اور کچھ بے صبرے ہو کرگرجا گھر کے دروازے کی جانب بڑھنے لگے جس کی وجہ سے وہاں صورتحال خراب ہوئی ۔

اس واقعے کی  کچھ ویڈیوز بھی سامنے آئی ہیں جن میں دیکھا جاسکتا ہے کہ  افراتفری کی صورتحال ہے اور زمین پر مستحقین کو دیے گئے کپڑے اور جوتے زمین پر بکھرے ہوئے ہیں جبکہ ڈاکٹرز اور امدادی کارکن زخمیوں کی مدد کررہے ہیں ۔

واقعے کے بعد سکیورٹی فورسز کے علاقے کو گھیرے میں لے لیا ہے اور مرنے والوں کی لاشیں  منتقل کی جا رہی ہیں۔

پولیس کی جانب سے واقعے پر تحقیقات کا آغاز کردیا گیا ہے ۔