وزیراعظم آج سے ترکی کا تین روزہ سرکاری دورہ کرینگے

تفصیلات کے مطابق دورے کے دوران وزیراعظم صدر اردگان سے ملاقات کریں گے،  ملاقات  کے بعد وفود کی سطح پر بات چیت ہوگی ۔ یہ وزیر اعظم کا عہدہ سنبھالنے کے بعد ترکی کا پہلا دورہ ہو گا۔ 

پاکستان ترکی دوطرفہ تعلقات کے تمام پہلوؤں کا احاطہ کرنے کے علاوہ دونوں رہنما علاقائی اور بین الاقوامی امور پر تبادلہ خیال کریں گے ۔  دونوں رہنما اپنی ملاقاتوں کے بعد مشترکہ نیوز کانفرنس سے خطاب کریں گے۔

اس سال پاکستان اور ترکی سفارتی تعلقات کے قیام کی 75ویں سالگرہ منا رہے ہیں ۔ دورے کے دوران، وزیراعظم پاکستان اور ترکی کے صدر مشترکہ طور پر ایک لوگو کی نقاب کشائی کریں گے، جو غیر معمولی دوطرفہ تعلقات کی طویل تاریخ میں اس اہم سنگ میل کی تقریبات کا آغاز ہوگا۔

دورے کے دوران ترک وزرائے خارجہ، تجارت اور صحت کے وزرا وزیر اعظم سے ملاقات کریں گے۔

وزیراعظم ترک فارن اکنامک ریلیشن بورڈ کے تعاون سے منعقد ہونیوالے پاک ترکی بزنس کونسل فورم میں بھی شرکت کرینگے ،  ان تقریبات کے دوران وزیراعظم پاکستان میں سرمایہ کاری کے وسیع امکانات کو اجاگر کرینگے اور ترک کمپنیوں کو پاکستان میں سرمایہ کاری کرنے اور پاکستان ترکی تجارتی اور اقتصادی تعلقات کو مضبوط بنانے کیلئے کام کرنے کی ترغیب دینگے۔ 

 وزیر اعظم کے دورہ ترکی سے دونوں ممالک کے درمیان قیادت کے مکالمے اور موجودہ کثیر جہتی سٹریٹجک تعلقات کو مزید مضبوط بنانے میں مدد ملے گی اور اس منفرد شراکت داری کو نئی بلندیوں تک لے جانے کی کوششوں کو نئی تحریک ملے گی۔