اسلام آباد میں احتجاج ، تحریک انصاف نے سپریم کورٹ میں درخواست دائر کردی

تفصیلات کے مطا بق  تحریک انصاف  کے سیکرٹری جنرل اسد عمر  کی جانب سے دائر آئینی درخواست میں وزارت داخلہ ، آئی جی اسلام آباد اور ہوم  سیکرٹریز کو فریق  بنایا گیا ہے۔

درخواست میں مؤقف اختیار کیا گیا ہےکہ عدالت حکم دے کہ پی ٹی آئی کو اسلام آباد میں پرامن احتجاج اور اجتماع کی اجازت دی جائے، پی ٹی آئی کے احتجاج کے راستے میں کسی شہر میں رکاوٹیں کھڑی نہ کی جائیں ۔

درخواست میں مزید کہا گیا ہے کہ عدالت حکم دے کہ پی ٹی آئی کے کسی کارکن اور رہنما کو گرفتار یا اس پر تشدد نہ کیا جائے، پی ٹی آئی کے خلاف ڈرانے والے ہتھکنڈے اور گھروں پر چھاپے نہ مارے جائیں ، عوام کی نقل و حرکت کو کسی طورپرکسی شہر میں نہ روکا جائے۔

درخواست میں استدعا  کی گئی ہےکہ عدالت حکم دے کہ احتجاج کیلئے آنے والوں کیخلاف کسی قسم کا کوئی ایکشن یا کارروائی نہ کی جائے ۔

درخواست میں کہا گیا ہے کہ پر امن احتجاج ہر شہری کا حق ہے ، آئین کے آرٹیکل 4، 5، 8 ، 9، 10، 14،15،16،17،19 بنیادی حقوق کی گارنٹی دیتے ہیں اوران  آرٹیکلز میں دئیے حقوق کو حکومت ختم نہیں کر سکتی ۔  پر امن شہریوں کو گرفتار کرنا آرٹیکل 9 اور 10 کی خلاف ورزی ہے ،  جمہوری مطالبات کو حاصل کرنے کیلئے شہری احتجاج کا حق رکھتے ہیں۔ 

یاد رہے کہ تحریک انصاف نے اس کیس میں بابر اعوان کی جگہ علی ظفر کی خدمات حاصل کی ہیں اور یہ درخواست بھی انہی کے ذریعے دائر کی گئی ہے۔

واضح رہے کہ سابق وزیراعظم عمران خان نے حکومت  کی جانب سے الیکشن کا اعلان نہ کرنے کی صورت میں اسلام آباد  میں احتجاج کی کال دے رکھی ہے۔