وزیراعظم کا پاکستان اورترکی کےدرمیان تجارتی تعلقات کےفروغ کیلئےمواقع سےاستفادہ کی ضرورت پرزور

تفصیلات کے مطابق انقرہ میں ترکی پاکستان بزنس کونسل سے خطاب  کرتے ہوئے وزیراعظم  شہباز شریف نے کہا کہ دونوں ملکوں میں ٹیکسٹائل کی صنعت میں تعاون کے وسیع مواقع موجود ہیں اور ا س ضمن میں مشترکہ حکمت عملی سے صنعت کو مزید ترقی ملے گی۔ 

وزیراعظم شہباز شریف نے ترکی کی کاروباری برادری کو پاکستان میں سرمایہ کاری کی دعوت دی اور کہا کہ حکومت اس ضمن میں تمام ممکن سہولتیں فراہم کرے گی۔

 انہوں نے کہا کہ پاکستان اور ترکی نے زلزلے، خوراک اور دوسری قدرتی آفات کے دوران مشکل وقت میں ایک دوسرے کی مدد کی ہے۔

شہباز شریف نے کہا کہ مشترکہ منصوبوں کے ذریعے دونوں ملک ترقی اور خوشحالی کے راستے پر تیزی سے آگے بڑھ سکتے ہیں ۔ ان کا کہنا تھا کہ حکومت پاکستان کو اس وقت درپیش اقتصادی چیلنجوں سے نمٹنے کیلئے موثر اقدامات کررہی ہے۔

وزیراعظم نے ترک تاجروں کو پاکستان میں پن بجلی ، شمسی توانائی اور ہوا سے بجلی پیدا کرنے کے منصوبوں میں سرمایہ کاری کی بھی دعوت دی ۔

انہوں نے پاکستان میں سولر پارکس کے منصوبوں میں ترک سرمایہ کاری کو سراہا۔ شہباز شریف نے کہا کہ ملک میں ڈیموں کی تعمیر کے بعد پاکستان چالیس ہزار میگاواٹ بجلی پیدا کرنے کی صلاحیت حاصل کرلے گا ۔ 

انہوں نے ڈیموں کی تعمیر، سستی بجلی کی پیداوار اور گاڑیوں کی تیاری کے شعبوں میں ترکی کی شاندار صلاحیتوں سے استفادہ کرنے کی خواہش ظاہر کی ۔

وزیراعظم شہباز شریف نے پاکستان میں ترک سرمایہ کاری کو ترکی کی تاجر برادری کیلئے منافع بخش قرار دیا۔