بنی گالہ کی سکیورٹی ہائی الرٹ کر دی گئی

میڈیا ذرائع کے مطابق کارکنان بنی گالہ پہنچنا شروع ہو گئے ہیں جو کہ سابق وزیر اعظم عمران خان کی بنی گالہ پہنچنے پر ممکنہ گرفتاری کی کوشش کے خلاف مزاحمت کریں گے۔

دوسری جانب پولیس کی جانب سے سابق وزیر اعظم کی بنی گالہ میں متوقع آمد پر سکیورٹی کے سخت انتظامات کیے گئے ہیں، حکام کا کہنا ہے کہ اسلام آباد میں دفعہ 144 نافذ ہے، کسی بھی قسم کے احتجاج پر پابندی ہے۔ 

چیئرمین تحریک انصاف نے بنی گالہ میں پی ٹی آئی کور کمیٹی کا اجلاس بھی طلب کر لیا ہے جس میں مستقبل کے لائحہ عمل کے حوالے سے مشاورت کی جائے گی، لانگ مارچ، قانونی اور سیاسی معاملات بھی زیر بحث لائے جائیں گے۔

واضح رہے کہ گزشتہ روز ایک خبر سامنے آئی تھی جس میں بتایا گیا کہ اتوار کے روز سابق وزیر اعظم عمران خان پشاور سے اسلام آباد واپس اپنی رہائش گاہ بنی گالہ منتقل ہوجائیں گے۔

سابق وزیر اعظم اسلام آباد لانگ مارچ ختم کرنےکے بعد سے پشاور میں ہی مقیم ہیں اور خیبر پختونخوا کے مختلف علاقوں میں سیاسی پاور شو کر رہے ہیں۔