وزیراعظم کا بنگلہ دیش میں آتشزدگی کے واقعہ میں قیمتی جانی نقصان پر دکھ کا اظہار

تفصیلات کے مطابق سماجی رابطے کی ویب سائٹ  ٹوئٹر پر اپنے پیغام  میں وزیراعظم شہبازشریف نے کہا کہ بنگلہ دیش میں آتشزدگی کے واقعہ میں قیمتی جانی نقصان پر گہرا دکھ ہوا ہے ۔

انہوں نے کہا کہ میری دلی تعزیت اور مخلصانہ ہمدردیاں بنگلہ دیش کی حکومت اور عوام کے ساتھ ہے ۔

Sad to hear about the loss of precious lives in a fire incident in Bangladesh. My heartfelt condolences & most sincere sympathies are with the government and people of Bangladesh.

— Shehbaz Sharif (@CMShehbaz) June 6, 2022

واضح رہے کہ گزشتہ روز  بنگلہ دیش کے ساحلی شہر چٹاگانگ میں ایک کنٹینر ڈپو میں شدید آگ لگنے کی وجہ سے کم از کم 50  افراد ہلاک جبکہ 300 سے زائد زخمی ہوئے ہیں۔

سیتا کنڈ میں ایک مقام پر جب کئی شپنگ کنٹینرز میں آگ لگنے سے دھماکے ہوئے تو سینکڑوں لوگ وہاں آگ پر قابو پانے کے لیے پہنچے تھے ۔  دھماکا اتنا شدید تھا کہ اس کی آواز کئی کلومیٹر دور تک سنی گئی اور آس پاس کی عمارتوں کے شیشے ٹوٹ گئے ۔

فائر فائٹرز اتوار کو بھی آگ بجھانے کی کوشش کر رہے ہیں ۔  فائر حکام کے مطابق ڈپو میں کیمیکل کے باعث  مسلسل دھماکوں نے آگ بجھانے کے عمل کو مزید مشکل بنا دیا ہے۔

رپورٹس کے مطابق سیتا کنڈ کے ڈپو میں تقریباً 4,000 کنٹینرز کو ذخیرہ کیا گیا تھا ، جو بنگلہ دیش کے دوسرے سب سے بڑے شہر چٹاگانگ کی بندرگاہ سے گزرنے والے کنٹینرز کے لیے ایک ٹرانزٹ پوائنٹ ہے۔

بنگلہ دیش میں حالیہ برسوں میں کئی بڑی آتشزدگی کی وجہ سے سینکڑوں اموات ہوئی ہیں ۔ گذشتہ سال ملک کے جنوب میں ایک فیری میں آگ لگنے سے کم از کم 39 افراد ہلاک ہو گئے تھے ۔ 

رواں سال کے آغاز میں دارالحکومت ڈھاکہ کے قریب روپ گنج میں ایک فیکٹری میں آگ لگنے سے کم از کم 52 افراد ہلاک ہو گئے تھے ۔