سدھو موسے والا قتل کیس میں ہریانہ سے ایک اور شخص گرفتار

انڈین پنجابی گلوکار اور سیاست دان سدھو موسے والا قتل کیس میں ایک اور شخص کو ہریانہ سے گرفتار کیا گیا ہے۔
انڈیا ٹوڈے کی رپورٹ کے مطابق فتح آباد کے موسے الی نامی گاؤں سے گرفتار ہونے والے شخص کی شناخت دیوندر عرف کالا کے نام سے ہوئی ہے۔
ان پر الزام پر کہ انہوں نے مبینہ طور پر قتل میں ملوث دو ملزموں چرنجیت اور کیشیو کو پناہ دی تھی۔رپورٹ کے مطابق کالا کے خلاف مقدمہ درج کر لیا گیا ہے۔
خیال رہے دو جون کو پنجاب اور فتح آباد پولیس کی مشترکہ ٹیم نے ایک چھاپے کے دوران دو نوجوانوں پون بشونی اور نصیب خان کو گرفتار کیا تھا۔
نصیب خان نے مبینہ طور پر حملے کے لیے ملزمان کو کار مہیا کی تھی۔
رپورٹ کے مطابق نصیب خان خود راجھستان سے کار لائے تھے اور فتح آباد میں چرنجیب، پریاوراؤ فوجی اور انکیت جانتی سرسا کو دی تھی۔
چرنجیب اور کیشیو 25 مئی کو صبح سات بجے بسالا کے ایک پیٹرول پمپ پر دیکھے گئے تھے۔
29 مئی کو نامعلوم مسلح افراد نے سدھو موسے والا کو سفر کے دوران قتل کر دیا تھا۔ حملے میں تین قسم کا اسلحہ استعمال ہوا جس میں اے این 94 رائفل بھی شامل تھی جبکہ جائے وقوعہ سے گولیوں کے 30 خول بھی ملے تھے۔
واقعہ پنجاب حکومت کی جانب سے سدھو موسے والا کی سکیورٹی واپس لیے جانے کے چند روز پیش آیا تھا۔
کینیڈا میں مقیم گینگسٹر گولڈی برار کی جانب سے واقعے کی ذمہ داری قبول کیے جانے کے بعد لارنس بشونی گینگ پولیس کی نظر میں آ گئی تھی کیونکہ گولڈی برار جیل میں قید لارنس بشونی کے قریبی ساتھی ہیں، جنہوں نے دعوٰی کیا تھا کہ انہوں نے وکی مدھو کھیرا کے قتل کا بدلہ لینے سدھو موسے والا کو قتل کیا۔