بجلی کا شارٹ فال 8 ہزار میگاواٹ سے زیادہ، کراچی میں 16 گھنٹے کی لوڈشیڈنگ

حکومت کے وعدے وفا نہ ہوسکے، اسلام آباد، کراچی، لاہور، پشاور سمیت ملک بھر میں لوڈشیڈنگ کا مسئلہ جوں کا توں، بجلی کا شارٹ فال چھ ہزار میگاواٹ سے زیادہ  ہو گیا۔

کراچی میں لوڈشیڈنگ کا دورانیہ سولہ گھنٹے تک پہنچ گیا، اسلام آباد میں 4سے 6 گھنٹے تک بجلی بند رہی، جبکہ لاہور میں سات سے آٹھ گھنٹے، پشاور اور کوئٹہ میں دس دس گھنٹے کی لوڈشیڈنگ جاری ہے۔

کراچی میں شدید گرمی کے ساتھ سولہ گھنٹے کی لوڈشیڈنگ سے شہری بلبلا اٹھے، سرجانی ٹاؤن ، نیو کراچی، لیاری، اورنگی ٹاؤن، کورنگی، بلدیہ اور لانڈھی کے علاقے سب سے زیادہ متاثر ہوئے ہیں۔

کے الیکٹرک نے واجبات کی عدم ادائیگی کو لوڈشیڈنگ کی وجہ بتایا ہے۔

لیسکو کی طلب 5700 میگاواٹ تک جاپہنچی ہے، جبکہ شارٹ فال 800 میگاواٹ ہے، نیشنل گرڈ اسٹیشن سے لیسکو کو4ہزار 900 میگاواٹ بجلی کی فراہمی جاری ہے، ترجمان کا کہنا ہے کہ لیسکو نے ساڑھے 3گھنٹے بجلی لوڈشیڈنگ کا شیڈول جاری کیا ہے۔

شدید گرمی میں بجلی غائب ہونے سے شہریوں کی جان پر بن آئی ہے۔ ایک نہیں دو نہیں دس سے چودہ گھنٹے تک بجلی کی بندش نے شہریوں کو چکرا کر رکھ دیا۔ ملتان، گجرانوالہ ، رائیونڈ ، ساہیوال کے شہری لوڈ شیڈنگ سے پریشان ہیں، کشمور، جہانیاں ،فورٹ عباس، جتوئی سمیت مختلف علاقوں میں شہریوں کا بجلی کی طویل لوڈشیڈںگ نے جینا محال کردیا۔

ٹوبہ ٹیک سنگھ، ،پنڈدادنخان، دینہ، کوٹ ڈیجی اور کمالیہ میں بھی گھنٹوں کی لوڈ شیڈنگ جاری ہے۔