کراچی : حلقہ این اے 240 میں ضمنی انتخاب، پولنگ کا عمل جاری

تفصیلات کے مطابق  حلقےکے 309 پولنگ اسٹیشن پر صبح 8 بجے سے شام 5 بجے تک ووٹنگ ہوگی ۔

متحدہ قومی موومنٹ (ایم کیو ایم پاکستان) کے امیدوار محمد ابوبکر اپنی جماعت کی نشست دوبارہ حاصل کرنے کے لئے کوشاں ہیں جبکہ مہاجر قومی موومنٹ کے رفیع الدین فیصل اور پاک سرزمین پارٹی (پی ایس پی) کے شبیر قائم خانی ان کے مقابلے میں موجود ہیں۔ 

قومی اسمبلی کی یہ نشست جیتنے کے لئے پیپلزپارٹی کے ناصر لودھی اور تحریک لبیک کے کاشف قادری کے درمیان مقابلہ ہے  جبکہ تحریک انصاف اور جماعت اسلامی نے الیکشن کا بائیکاٹ کیا ہے ، آزاد امیدواروں کی تعداد 18 ہے۔ 

الیکشن کمیشن  کے مطابق این اے 240 میں رجسٹرڈ ووٹوں کی تعداد 5 لاکھ 29 ہزار 855 ہے ،  مرد ووٹرز کی تعداد 2 لاکھ 94 ہزار 385 ، خواتین ووٹرز کی تعداد 2 لاکھ 35 ہزار 470  ہے ۔

مردوں کیلئے 100، خواتین کے لیے 99 جبکہ 110 مشترکہ پولنگ اسٹیشن بنائے گئے ہیں ، 309پولنگ اسٹیشنز پر مردوخواتین کے لیے مجموعی طور پر 1236 پولنگ بوتھ بنائے گئے ہیں جبکہ الیکشن کمیشن نے پورے حلقے کو حساس قرار دیا ہے ۔  حساس پولنگ اسٹیشنوں کی سی سی ٹی وی کیمروں سے مانیٹرنگ کی جائیگی ۔ 

ضمنی انتخاب کے لئے حلقے میں گزشتہ روز ہی پولنگ کا سامان پہنچا دیا گیا تھا۔

یاد رہے کہ  یہ نشست ایم کیو ایم پاکستان کے اقبال محمد علی خان کے انتقال کے باعث خالی ہوئی تھی۔ اقبال محمد علی اس نشست پر 61 ہزار 165 ووٹ لے کر کامیاب ہوئے تھے جبکہ تحریک لبیک پاکستان (ٹی ایل پی) کے امیدوار محمد آصف 30 ہزار 535 ووٹ لے کر دوسرے نمبر پر رہے تھے۔