پاکستان سے شراکت داری بڑھانے پر کام کر رہے ہیں، امریکا

ترجمان امریکی محکمہ خارجہ نیڈ پرائس کا کہنا ہے کہ پاکستان امریکہ کا ایک ہم شراکت دار ہے، اس شراکت داری کو بڑھانے کے لیے مشترکہ مفادات پر کام کر رہے ہیں۔

انہوں نے کہا کہ بلاول بھٹو سے وزیر خارجہ انٹونی بلنکن کی ملاقات میں کئی معاملات پر تعمیری گفتگو ہوئی، روس کا یوکرین پر حملہ بھی پاک امریکہ وزرائے خارجہ کی گفتگو کا حصہ رہا۔

بھارت کے روس سے تیل خریدنے سے متعلق سوال کے جواب میں نیڈ پرائس نے کہا کہ بھارت سے اس معاملے پر متعدد بار گفتگو ہو چکی ہے، بھارت کو واضح کر چکے ہیں کہ ان کی مدد اور شراکت داری کے لیے تیار ہیں، مگر بھارت سے ایسی شراکت داری نہیں بنا سکے، جیسی اس کی روس کے ساتھ ہے۔

نیڈ پرائس نے اپنی نیوز کانفرنس میں بھارت میں بی جے پی حکومت کی جانب سے مسلمانوں کے گھروں کو گرائے جانے کی مذمت کرتے ہوئے کہا کہ ہم نے بی جے پی کے دو عہدیداروں کے جارحانہ تبصروں کی مذمت کی ہے۔

نیڈ پرائس نے کہا کہ بھارت کو انسانی حقوق کے احترام کو فروغ دینے کی ترغیب دیتے ہیں۔