عمران خان نے آئی ایم ایف سے معاہدہ کیا اور خلاف ورزی کی، مفتاح اسماعیل

تفصیلات کے مطابق سرکاری ٹی وی کو خصوصی انٹرویو دیتے ہوئے انہوں نے کہا کہ تحریک انصاف حکومت نے 48 روپے میں چینی برآمد کی اور96 روپے میں درآمد کی، ہم نے حکومت میں آتے ہی اشیائے خورد ونوش کی قیمتوں کو کنٹرول کیا۔

مفتاح اسماعیل نے کہا کہ عمران خان نے آئی ایم ایف سے معاہدہ کیا اور اس کی خلاف ورزی کی، پی ٹی آئی حکومت کے کئی اقدامات سے کرنٹ اکاؤنٹ خسارہ بڑھا۔

وفاقی وزیر خزانہ نے کہا کہ ملک میں جو مہنگائی آرہی ہے وہ عمران خان کی نااہلی کی وجہ سے ہے، عمران خان نے ایل این جی خرید کر ڈومیسٹک ریٹ پر بیچ دی، گزشتہ حکو مت نے نیب قوامین کو سیاسی مخالفین کے خلاف استعمال کیا۔

انہوں نے کہا کہ ہمارا سب سے پہلا کام ملک کو ڈیفالٹ ہونے سے بچانا تھا، ہم نے امیروں پر10 فیصد سپر ٹیکس لگایا، میں نے اپنے وزیراعظم کے بچوں کی کمپنیوں پر ٹیکس لگایا۔

خصوصی انٹرویو دیتے ہوئے وفاقی وزیر خزانہ مفتاح اسماعیل نے کہا کہ ملک کو دیوالیہ ہونے سے بچانے کے لیے حکومت نے مشکل فیصلے کئے۔ انہوں نے واضح طور پر کہا کہ عالمی منڈی میں تیل کی قیمتوں میں کمی ہوئی تو عوام کو ریلیف دیں گے۔