عمران خان نے جو بحران پیدا کیا وہ ختم ہو گیا ہے:مریم نواز

ضمنی انتخابات کے حوالے سے چیچہ وطنی میں منعقدہ جلسے سے خطاب میں مریم نواز نے کہا کہ فرح گوگی وہ ہے جو سارا پنجاب لوٹ کر کھا گئی، فتنہ خان نے وزیراعظم ہاؤس کو بلیک میلنگ کا اڈہ بنا دیا، طیبہ گل کو حبس بیجا میں رکھا۔

انہوں نے کہا کہ پیٹرول اور ڈیزل کی قیمتیں عمران خان کی وجہ سے بڑھانی پڑیں، جتنے مشکل فیصلے ہونے تھے ہو گئے اب اچھےدن آنے والے ہیں،ہم آلو پیاز کے ریٹ پتہ کرنے آئے ہیں، ہم عوام کی مشکلات کو ختم کر دیں گے۔

مریم نواز نے سابق وزیر اعظم عمران خان کے حوالے سے کہا کہ اس کے پاس بتانے کے لیے کچھ نہیں اس لیے گالیاں دے کر چلے جاتے ہیں،شہباز شریف عوام کے لیے بڑے ریلیف کا اعلان کرنے والے ہیں،عالمی منڈی میں قیمتیں کم ہوتے ہی شہبازشریف عوام کوریلیف دیں گے۔

ان کا کہنا تھا کہ 2018ء کے الیکشن سے پہلے عمران خان نے 5 وعدے کیے تھے، جس وزیراعظم ہاؤس کو یونیورسٹی بنانا تھا اس کو اس نے بلیک میلنگ کا اڈہ بنا دیا، 4 سال عمران خان نواز شریف کے منصوبوں پر تختیاں لگاتے رہے، یہ پہلا حکمران ہے جو ریاست پاکستان کو ملے تحفوں کو بیچ کر پیسہ بناتا رہا۔

اپنے خطاب میں رہنما مسلم لیگ ن کا کہنا تھا کہ سازشوں کا رونا رہتا ہے، جتنی سازشیں تم نے کی ہیں اس کا حساب ہوگا، عمران خان چار سال میں کوئی چار کام بھی نہیں کر سکے، مسلم لیگ مسائل کے حل کے لیے کوشاں ہے۔