کون بنے گا وزیراعلی پنجاب ؟ تاریخی دنگل آج ہوگا

صوبہ پنجاب میں وزیر اعلٰی کون ہوگا ، اس کا فیصلہ آج پنجاب اسمبلی کے ارکان اپنے ووٹ کے ذریعے کریں گے ۔ پی ٹی آئی کے 188 ن لیگ اور اتحادیوں کے 178 اراکین اسمبلی کا ٹاکرا ہوگا

لاہور ہائی کورٹ کے حکم کے مطابق پنجاب اسمبلی کے اندر ووٹنگ کا عمل سہ پہر 4 بجے شروع ہوگا جبکہ ڈپٹی سپیکر اسمبلی دوست محمد مزاری پریذائیڈنگ افسر کا کردار ادا کریں گے۔ 

اس سلسلے میں  پنجاب اسمبلی میں مہمانوں کا داخلہ بند کردیا گیا ، میڈیا پریس گیلری سے کوریج کرے گا ، موبائل فون لے جانے کی اجازت نہیں ہے۔

پنجاب اسمبلی میں وزیر اعلیٰ کے انتخاب کے سلسلے میں جمعہ کو ہونے والے اجلاس کی سیکیورٹی سے متعلق ڈپٹی اسپیکر کے مراسلے پر سیکیورٹی پلان بھی مرتب کرلیا گیا  ہے ۔ 

نو منتخب اراکین کی حلف برداری

پنجاب اسمبلی میں پی ٹی آئی کے 15 ، مسلم لیگ (ن) کے 3 اور ایک آزاد رکن نے حلف اٹھا لیا۔ یہ اراکین وزیر اعلیٰ کے انتخاب میں ووٹ بھی کاسٹ کر سکیں گے، اسپیکر چوہدری پرویز الہٰی نے نومنتخب اراکین سے حلف لیا۔

زین قریشی، حسن ملک، عرفان اللّٰہ نیازی، میاں اعظم، مہر نواز بھروانہ، خرم شہزاد ورک، اور میاں اکرم عثمان نے حلف اٹھایا۔ ان کے علاوہ شبیر گجر، ظہیر عباس کھوکھر، غلام سرور، عامر اقبال شاہ، محمد معظم، قیصر عباس، سیف الدین کھوسہ، علی افضل ساہی اور آزاد رکن پیر رفیع الدین نے بھی حلف اٹھایا۔

پنجاب اسمبلی میں وزیر اعلیٰ کے انتخاب کے سلسلے میں جمعہ کو ہونے والے اجلاس کی سیکیورٹی سے متعلق ڈپٹی اسپیکر کے مراسلے پر سیکیورٹی پلان مرتب کرلیا گیا۔ڈپٹی اسپیکر دوست مزاری نے چیف سیکریٹری اور انسپکٹر جنرل (آئی جی) پولیس کو مراسلہ لکھا جس میں انہوں نے سیکیورٹی فراہم کرنے کا مطالبہ بھی کیا ۔ 

خیال رہے کہ 17 جولائی کو منعقد ہونے والے ضمنی انتخابات میں تحریک انصاف نے 20 میں سے 15 نشستیں جیتیں جبکہ ن لیگ چار سیٹوں پر کامیاب ہوئی اور ایک نشست آزاد امیدوار  نے حاصل کی تھی ۔