وزیراعلی کا انتخاب: سپریم کورٹ میں فل کورٹ بنانے کی درخواست دائر

تفصیلات کے مطابق حمزہ شہباز کی جانب سے دائر درخواست میں الیکشن کمیشن کے فیصلے کے خلاف منحرف ارکان کی اپیلیں بھی رولنگ کیس کے ساتھ سننے کی استدعا کی گئی ہے ۔

درخواست میں موقف  اختیا ر کیا گیا ہے کہ  ڈپٹی سپیکر دوست محمد مزاری  کی 22 جولائی کو دی گئی رولنگ درست ہے ، الیکشن کمیشن نے منحرف ارکان کے خلاف فیصلے میں عمران خان کی جانب سے جاری کی گئی ہدایات کو تسلیم کیا۔

درخواست میں کہا گیا ہے کہ سپریم کورٹ میں منحرف ارکان کی اپیلیں منظور ہوگئیں تو صورتحال یکسر تبدیل ہوجائے گی ، 25 منحرف ارکان کے نکالے گئے ووٹ بھی  گنتی میں شمار ہوں گے۔

درخواست کے مطابق چوہدری شجاعت حسین کا اپنے ایم پی ایز کو لکھا گیا خط بھی  آئین اور قانون کے مطابق درست ہے۔

حمزہ شہباز نے درخواست میں  آرٹیکل 63 اے کے فیصلے پر نظر ثانی کی دائر درخواستوں پر بھی ایک ساتھ سماعت کی استدعا کی ہے۔

ڈپٹی اسپیکر کی رولنگ کیخلاف کیس کی سماعت 

دوسری جانب سپریم کورٹ  آج سپیکر پنجاب اسمبلی چوہدری پرویز الٰہی کی جانب سے وزیراعلٰی پنجاب حمزہ شہباز شریف کے انتخاب کے خلاف دائر درخواست کی سماعت کرے گی۔

سپریم کورٹ سے حکومتی اتحادیوں اور پی ڈی ایم میں شامل جماعتوں نے وزیراعلیٰ پنجاب کے انتخاب کے معاملے میں فل کورٹ بینچ  بنانے کا مطالبہ کیا ہے ۔ 

سیاسی جماعتوں کے قائدین کے سپریم کورٹ داخلے پر پابندی عائد

سپریم کورٹ انتظامیہ نے تمام سیاسی جماعتوں کے قائدین کے سپریم کورٹ داخلے پر پابندی عائدکردی ہے ۔ 

ذرائع  کے مطابق  انتظامیہ نے سپریم کورٹ میں سیاسی جماعتوں کے قائدین کے داخلے پر پابندی عائد کردی ، صرف کیس سے متعلقہ وکلاء اور فریقین کو سپریم کورٹ میں داخلے کی اجازت ہوگی ۔ 

سیکیورٹی انتظامات 

کیس کی سماعت کے پیش نظر سکیورٹی کے خاطر خواہ انتظامات کئے گئے ہیں، سپریم کورٹ کے اندر اور باہر سیکورٹی کے سخت انتظامات کیے گئے ہیں جبکہ پولیس کی بھاری نفری بھی عدالت کے باہر تعینات کردی گئی ہے ۔ 

ریڈ زون میں اراکان اسمبلی اور میڈیا کی گاڑیوں کو داخلے کی اجازت ہوگی، گاڑیوں کے داخلے کے لیے ایکسپریس چوک بھی بند کر دیا گیا ہے۔