عدالتی فیصلے کے بعد تحریک انصاف کے کارکنوں کا جشن

تفصیلات کے مطابق پنجاب کے مختلف شہروں  لاہور، فیصل آباد، ملتان، گوجرانوالا سمیت صوبے بھرمیں پی ٹی آئی کے کارکنوں نے جشن منایا۔

گوجرانوالا، سیالکوٹ، شکرگڑھ ، لودھراں، حافظ آباد، بہاول نگر، کمالیہ، گوجرہ، گجرات، ٹوبہ ٹیک سنگھ، راجن پور اور پنجاب کے دیگر شہروں میں کارکنوں نے بھنگڑے ڈالے اور ڈھول کی تھاپ پر رقص کیا۔

اس موقع پر کارکنوں نے عمران خان کے حق میں نعرے بازی کی،  ملتان میں چُنگی نمبر نو پر تحریک انصاف کی جانب سے مٹھائیاں تقسیم کی گئیں۔

رپورٹس کے مطابق حیدرآباد اور سکھر سمیت سندھ کے مختلف شہروں میں بھی پی ٹی آئی کے کارکن خوشی سے جھوم اٹھے۔

تحریک اںصاف کے کارکنوں نے خوشی کا اظہار کرتے ہوئے ایک دوسرے کو مبارک باد دی اور مٹھائیاں تقیسم کیں ۔ پشاور سمیت خیبر پختونخوا کے مختلف علاقوں میں بھی کارکنوں نے ریلیاں نکال کر عدالتی فیصلے کو حق کی فتح قرار دیا۔

واضح رہے کہ گزشتہ روز سپریم کورٹ آف پاکستان نے چوہدری پرویز الہٰی کی درخواست منظور کرتے ہوئے وزیرِاعلیٰ پنجاب کے انتخاب میں ڈپٹی اسپیکر پنجاب اسمبلی دوست محمد مزاری کی رولنگ کالعدم قرار دیدی تھی جبکہ پرویز الہٰی کو پنجاب کا وزیراعلیٰ قرار دیا تھا۔