نواز شریف نے کہا تھا ادارے اپنی حدود میں رہ کر کام کریں:مریم اورنگزیب

پریس کانفرنس سے گفتگو کرتے ہوئے ترجمان حکومت مریم اورنگزیب نے کہا کہ نوازشریف 3 بار وزیراعظم رہے اور تینوں بار نکالے گئے،ان کے پاس رازتھےلیکن وہ ملک کی خاطرخاموش رہے، نواز شریف نے کہا تھا کہ ادارے آئینی حدود میں رہیں ان کا مؤقف آج بھی وہی ہے۔

مریم اورنگزیب نے کہا کہ تحریک انصاف کو خود عمران خان نے نقصان پہنچایا، افواج پاکستان سے لڑائی آپ نے خود لڑی، شہباز گل نےعمران خان کا دیا اسکرپٹ پڑھا، عمران خان کے اکسانے پر فوج کے خلاف مہم چلائی گئی، عمران خان نے نفرت کے جو بیج بوئے وہی کاٹ رہے ہیں۔

حکومتی ترجمان نے عمران خان کو ہدف تنقید بناتے ہوئے کہا کہ ادارے کو کہتے ہو مداخلت کرے، تمہاری پارٹی کو بچائے، آپ کی جماعت سے آوازیں اٹھ رہی ہیں فارن فنڈنگ کہاں گئی، 2013ء سے 2022ء تک جو پیسہ آیا اس کا حساب آپ نے دینا ہے، آپ فارن فنڈنگ میں 8 سال بعد پکڑے گئے۔

انہوں نے کہا کہ عمران خان کی پارٹی فارن ایڈڈ ڈیکلیئر ہو چکی ہے، توشہ خانہ کے تحفے لیکر بیچ دیئے اور ڈکلیئر نہیں کیے، ایک سال بعد توشہ خانہ کے تحفے ڈیکلیئر کیے اور پوری پالیسی تبدیل کروائی، آپ کی بیگم نے پوسٹنگ اور زمینوں کے عوض انگوٹھیاں لیں،آپ گھنٹہ گھنٹہ جھوٹ بولتے ہیں۔