مجھے کوئِی خوف نہیں ہے، ضمیر کا سودا نہیں کروں گا، اللہ کو جواب بھی دینا ہے:عمران خان

سابق وزیر اعظم عمران خان نے زوم میٹنگ میں گفتگو کرتے ہوئے کہا کہ کل ہم پاکستان کی 75 سالہ جشن آزادی بھرپور طریقے سے منائیں گے، کل 12 بجے تک جشن آزادی کا پروگرام ہوگا اور پھر اس کے بعد 14 اگست کا استقبال اچھے ڈھنگ سے کریں گے۔

انہوں نے کہا کہ پروگرام کا مقصد یہ ہے کہ ایک آزادی ہمیں 75 سال پہلے ملی تھی، وہ انگریز کی غلامی سے آزادی تھی، لیکن حقیقی آزادی کے لیے ابھی بھی ہمیں سفر طے کرنا ہے، وہ میں کل بتاؤں گا کہ ہمیں کیا کرنا ہے کہ ہم اصل میں آزاد ہو جائیں، پاکستان میں بیرونی سازش کے تحت رجیم تبدیل کی گئی اور ہماری حکومت ہٹا دی گئی، جنہوں نے یہ سازش کی ان کا یہ خیال تھا کہ پارٹی اب مکمل طور پر ختم ہو جائے گی۔

سابق وزیر اعظم نے کہا کہ ناانصافی پرحضرت علی رضی اللہ عنہ کا ایک بڑا مشہور قول بھی ہے کہ کفر کا نظام چل جائے گا لیکن ظلم اور ناانصافی کا نظام نہیں چل سکتا۔ خوف انسان کو بزدل بنا دیتا ہے اور کبھی بھی انسان کوئی بڑا کام نہیں کر سکتا جب تک کے وہ اپنے خوف پر پوری طرح قابو نہ پا لے۔

پی ڈی ایم حکومت سے متعلق ان کا کہنا تھا کہ ان چوروں کی لانگ ٹرم پلاننگ دیکھی جائے تو وہ یہ ہے کہ پہلے سختی کرو، پھر پراپیگنڈا کر کے کوئی چیز میرے بارے میں نکالی جائے اور اس کے بعد کوئی بین آجائے اور ڈیل یہ کی جائے کہ عمران خان کا بین تب ہی ہٹے گا جب نواز شریف کو نااہلی سے ہٹایا جائے، ساڑھے 3 سال میں مجھے میڈیا سے ڈر نہیں تھا کیونکہ میں نے اپنی زندگی میں کوئی کرپشن جیسی غلطی کی ہی نہیں ہے، میڈیا سے مجھے واحد مسئلہ یہ تھا کہ کوئی فیک نیوز میرے بارے میں نہ پھیلے۔