ٹوئٹر پر بھارتی ہیرا پھیری، پاکستان کا تشویش کا اظہار

اسلام آباد ایک بیان میں ترجمان دفتر خارجہ نے کہا کہ بھارتی حکومت نے ٹوئٹر کے سیکیورٹی سسٹم میں دراندازی کی کوشش کی ہے۔

انہوں نے مزید کہا کہ اس حوالے سے بھارتی اور امریکی میڈیا سے ملنے والی خبروں پر پاکستان کو سخت تشویش ہے۔

ترجمان دفتر خارجہ نے یہ بھی کہا کہ میڈیا رپورٹس میں واضح ہے کہ یہ معاملہ بھارتی پارلیمانی اسٹینڈنگ کمیٹی برائے انفارمیشن ٹیکنالوجی (آئی ٹی) کی ٹوئٹر کی بریفنگ میں سامنے آیا ہے۔

اُن کا کہنا تھا کہ ٹوئٹر کے ایک سابق ملازم نے امریکا میں قانونی بیانات پر بھی بات کی، سامنے آیا کہ ٹوئٹر پر کشمیری اور میڈیا پرسنز کو بھارت کے غیر سنجیدہ قانونی اعتراضات پر بلاک کیا جاتا ہے۔

ترجمان دفترخارجہ نے کہا کہ یہ کارروائیاں بین الاقوامی معیارات، اصولوں اور معلومات کے بہاؤ کے فریم ورک کے خلاف ہیں۔

انہوں نے کہا کہ بھارت پاکستان کے سفارتی مشنز اور ریڈیو پاکستان کے ٹوئٹر اکاؤنٹس کی بندش فوری طور پر واپس لے۔

دفتر خارجہ کے ترجمان کا کہنا تھا کہ بھارت اقوام متحدہ کے آزادی اظہار کے قائم بین الاقوامی اصولوں اور معیارات کی پاسداری کرے۔

انہوں نے کہا کہ بھارت عالمی سطح پر انٹرنیٹ ڈومین کو کنٹرول کرنے کےلیے حیلوں بہانوں کے استعمال سے باز رہے۔